Nafarroako Osasun Departamentuak ohartarazi duenez, «Gizarte Segurantzaren» izena erabilita iruzurra egiten saiatzen ari dira azken orduetan.
Azaldu dutenez, mezu bat bidaltzen ari dira, SMS bidez. Horretan, herritarrari esaten diote «osasun txartela eguneratu» behar duela, eta horretarako esteka bat ematen dute.
«Kontuz!», adierazi du Osasunbideak. «Iruzurrezko mezua da».
âš ï¸ÂKONTUZ!!
— Salud - Osasuna (@salud_na) May 25, 2023
Mezularitza mugikorreko sare eta aplikazioetatik testu-mezu bat (SMS) dabil, erabiltzaileari esteka batera sartzeko eskatzen diona, bere "Osasun Txartela" "eguneratzeko". BULO bat da. Gizarte Segurantza ordezten duen iruzurrezko mezua da. pic.twitter.com/kuySTzjmD5
Badirudi iruzurra phishing motakoa dela. Kutxa, banku edo erakunde baten irudiarekin mozorrotzen dute iruzurra, eta biktimari datu pertsonalak ateratzen saiatzen dira, izen-abizenak, nortasun agiriaren eta banku txartelaren zenbakiak.... Arrantzarekin dago lotuta ingelesezko phishing hitza; izan ere, jende askori bidaltzen diote mezua, horietako batzuk sarean eroriko direlakoan.
Otsailean, Zibersegurtasunaren Euskal Zentroak atzeman zuen iruzur «kanpaina masibo bat» zegoela, teknika hori erabiltzen zuena. Orduan, posta elektronikoaren bidez egin zuten.
