Garbitzaileen greba
Sagarduiren bulegoa «okupatu» dute Osakidetzako garbitzaile batzuek
Langileen arabera, Osakidetzak esku hartu behar du lan gatazkan, haren menpe daudelako garbiketarako azpikontratatzen dituen enpresak
Osakidetzak garbiketetarako azpikontratatzen dituen enpresetako bost langilek Gotzone Sagardui Osasun sailburuaren bulegoa okupatu dute Eusko Jaurlaritzaren egoitza nagusian, Gasteizen. Langileek azaldu dutenez, 90 egun daramate greban, eta guztira bost urtez aritu dira enpresekin lan hitzarmena negoziatzen. Besteak beste, euren baldintzak Osakidetzako langileenekin berdindu ditzatela exijitzen dabiltza.
«[Enpresek] tinko jarraitzen dute, eta horregatik jo dugu askotan haien bezeroaren atea, Osakidetzarena, baina zuzendariek beste alde batera begiratzen dute», adierazi dute ohar bidez bulegoan sartu direnek.
Osakidetzako zuzendaritzak «interesik» adierazi ez duela argudiatu dute langileek protesta egiteko. Gotzone Sagardui ez zegoen bertan Gora Garbitzaileak taldeko langileak sartu direnean, eta eskaerak eta erreibindikazioak haren idazkariari eman dizkiote, gogorarazteko «gatazka konpontzeko ardura» daukala.
Apirilaren 26tik maiatzaren 16ra hiru asteko lanuztea egin zuten LAB, UGT, CCOO eta ESK sindikatuek Osakidetzako garbiketan. Joan den maiatzaren 5ean, Bilboko sarrera nagusi bat oztopatu zuten. ELA bere kabuz ari da mobilizazioak egiten.
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
