Sei emakume prostituitzera behartzeagatik eta talde kriminal baten parte izatea egotzita, lau pertsona atxilotu dituzte Bilbon. Espainiako Poliziak zabaldu duen ohar baten arabera, Bolueta auzoko txalet batean behartzen zituzten emakumeak prostituzioan aritzera, haien osasuna larriki hondatzen zuten «abusuzko baldintzetan». Atxilotuak karguekin aske utzi dituzte.
Lau atxilotuak sexu esplotaziotik eratorritako diruaren erdiarekin geratzen ziren, eta droga kontsumitzera eta «beren onespenik gabeko praktika sexualak» egitera derrigortzen zituzten. Maiatzaren 11n erregistratu zuen Poliziak Boluetako etxe hori, eta bertan, prostituitzera behartuta zeuden sei emakumeez gain, horiek «kontrolpean mantentzeaz» arduratzen zen talde kriminaleko kide bat ere atzeman zuten. Hurrengo egunetan atxilotu zituzten beste hiru kideak; horietako batek aurrekariak zituen «adingabeen pornografiagatik». Bilboko epaitegira bideratu zituzten, eta hark aske utzi zituen, karguekin.
Erregistro horretan, gainera, 1.000 euro, viagra pilulak eta kalamua zeraman poltsa bat ere aurkitu zituzten, baita «emandako zerbitzuen inguruan»oharrak biltzen zituen koaderno bat ere.
