Lan gatazkak
Michelinen Gasteizko lantegian lau greba egun antolatu dituzte
ELA, LAB, CGT eta ESK sindikatuek deitu dute lanuzteetara. Datorren astean elkarretaratzea eta manifestazioa ere egingo dituzte.
Michelinen Gasteizko lantegian lau greba egun antolatzea adostu dute ELA, LAB, CGT eta ESK sindikatuek, lan hitzarmenaren negoziazioa dela eta. Hurrengo bi asteetan egingo dituzte lanuzteak, maiatzaren 31n, ekainaren 2an, 3an, eta 5ean. Horrez gain, elkarretaratzea eta manifestazioa ere egingo dituzte datorren asteartean.
Langileen ordezkariek erabaki dute zuzendaritzak aurkeztu berri dien azken proposamena ez onartzea, eta lan gatazka koska bat estutzea. Izan ere, sindikatuen arabera, soldatak ez dira KPIaren arabera igoko, enpresaren emaitzekin lotutako indize baten arabera baizik. Zuzendaritzak eskaini die soldatak %5 igotzea aurten, %3 hurrengo urtean, %2 2025ean, eta beste hainbeste 2026an. Eta beste %2 igotzeko aukera izango lukete bi urtean behin KPIa handiagoa bada, % 10eko mugarekin lehen bi urteetan, eta % 8ko mugarekin hurrengo bietan.
Sindikatuek, ordea, nahi dute soldatak KPIa adina igotzea, eta lanaldia murriztea. ELA, LAB, CGT eta ESK sindikatuek langile batzordearen %40 ordezkatzen dute; CCOO sindikatuak du gehiengoa, eta ez du babestu greba.
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
