Udal eta foru hauteskundeak igarota, laster Espainiako Gorteetarako bozak izango dituzte Hego Euskal Herriko biztanleek: uztailaren 23rako iragarri ditu Pedro Sanchez Espainiako gobernuburuak. Eusko Legebiltzarreko legealdia ere datorren urtean da amaitzekoa, eta, beraz, atzokoak hauteskunde ziklo berri bat zabaldu du Araban, Bizkaian, Gipuzkoan eta Nafarroan.
Ezin da estrapolazio zuzen-zuzenik egin, boto duala dela eta —herritarrek alderdi bati edo besteari ematea botoa aukeratu beharreko instituzioaren arabera—, baina udal eta foru hauteskundeetako emaitzek pista bat ematen dute Eusko Legebiltzarreko hauteskundeei begira izan litezkeen joerez. Datu horiek eskuan, horrela geratuko litzateke Eusko Legebiltzarra, Araban, Bizkaian eta Gipuzkoan D'Hondt sistema aplikatuta:
EAJ: 26 (-5)
EH Bildu: 24 (+3)
PSE-EE: 13 (+3)
PP: 7 (+1)
EP: 5 (-1)
Beraz, EAJren eta EH Bilduren arteko lehia estua litzateke Eusko Legebiltzarrean, apenas bi legebiltzarkideren aldea izango luketen, baina EAJk eta PSE-EEk sendo eutsiko liokete gaur egun duten aliantzari, 39 ordezkarirekin gehiengo absolutua lortuta. Haatik, ezkerreko alderdiek akordioa eginda ere gobernatzeko aukera izango litzateke: EH Bildu eta PSE-EE batuta, gehiengo absolutuaren atarian geratuko lirateke (37), eta langa hori gaindituko lukete Elkarrekin Podemos-IUrekin (42).
