Telebistari adi egon ziren atzo Euskal Herriko milaka herritar, udal, foru eta Nafarroako Parlamentuko hauteskundeetako datuak ezagutzeko jakin-minez. ETBko bi kateek zuzeneko emanaldiak egin zituzten, bospasei ordukoak. Eta ikusle datuak hauek izan ziren: Araban, Bizkaian eta Gipuzkoan, ETB2ko hauteskundeetako saio bereziak %21eko ikusle kuota bereganatu zuen. ETB1eko saioak, berriz, %2,4ko ikusle kuota lortu zuen —euskaldunen artean, %5,7koa—. 205.000 herritarrek bat egin zuten noizbait ETB1eko saioarekin.
21:00etatik 23:00etarako tartean, ETBko bi kateek batuta, %30,4ko ikusle kuota izan zuten. EITBren webguneak, bestalde, 250.335 erabiltzaile bakar izan zituen, ohiko igande batekoak halako bi. Interneteko streaming bidezko ETBko zuzeneko emanaldiak ikusi zituzten, halaber, 16.000 herritarrek.
Kataluniako TV3 katearen zuzeneko emanaldiak —20:40etik 23:00etarako tartean— %25eko ikusle kuota lortu zuen; eta talde bereko 3/24 kateak, %3,6koa. Katalanez izan ziren biak ala biak.
Galizian, berriz, TVGren galegozko saio bereziak %26ko ikusle kuota lortu zuen.
Espainiako telebista kateei dagokienez, Atresmedia taldeko La Sexta eta Antena3 kateek programa bereziak egin zituzten. Halakorik ez zuten egin, ordea, Mediaseteko Tele5k eta Cuatrok.
