Hego Euskal Herriko udalak, Arabako, Bizkaiko eta Gipuzkoako Batzar Nagusiak eta Nafarroako Parlamentuko ordezkariak aukeratzeko bozketa izan zen igandekoa. Jakinak dira emaitza orokorrak: EH Bilduk 366.024 boto eskuratu zituen, eta lehen indarra izan zen Gasteizen; EAJk, berriz, 322.347 boto jaso zituen, eta lehen indarra da Araban, Bizkaian eta Donostian. Nafarroan, UPN izan da lehen indarra, 81.680 boto lortuta, baina PSNk eskuratu du gobernua berriro osatzea.
Horiek datu orokorrak. Hauteskundeek, baina, xehetasun maila handiagoa ere eskaintzen dute, hauteskundeen emaitzak mahaiz mahai, barrutiz barruti eta atalez atal ebazten direnez gero. Horixe prestatu du BERRIAk: Euskal Herri osoko emaitzen mapa, atalez atal.
Argazkiaren fokua handitzeak ahalbidetzen du, adibidez, hiriburuetako errealitatea zehatzago ezagutzea. Esaterako, Bilbon, nabarmena da EAJren nagusitasuna; auzo eta mahai gehienetan da lehen indarra. Salbuespenak daude, ordea: Bilbo Zaharreko, San Frantziskoko eta Zazpi Kaleetako zenbait ataletan EH Bildu aurretik geratu da, eta PSE-EE lehen indarra da mahai bakan batzuetan, Otxarkoagan, Deustun eta Betolatzan, Errekalden.
Gasteizen, kolore aniztasuna antzeman daiteke atalkako mapari erreparatuta. Abetxukun, Sansomendin, Zaramagan... PSE-EE izan da lehen indarra, eta EH Bildu Alde Zaharrean, Zabalganan eta Errekaleorren, besteak beste. PPren kolore urdina ere nabari da: San Martinen, Txagorritxun, Armentian eta Mendizorrotzan, adibidez. Eta mahai kopuru eskasagoak bereganatu ditu EAJk:
Donostian, berriz, EAJren eta EH Bilduren tonalitateak daude orekatu samar. Jeltzaleek lortu dituzte zinegotzi gehien (9), eta hori nabari da esaterako Amara Berrin, Antiguan, Erdialdean eta Groseko parte handi batean lortutako garipenetan. Aldiz, EH Bildu aurretik geratu da Igeldon, Egian, Parte Zaharrean, Martutenen eta Añorgan. PSE-EEren indargune izaten jarraitzen du ekialdeak, eta PP lehen indarra da hiri osoko bi mahaitan, Aieten eta Amaran.
Iruñean, lehia estua izan zuten igande gauean UPNk eta EH Bilduk. Cristina Ibarrola buru duen zerrenda nagusitu zen. Baina lehia hori grafikoki ikus daiteke Iruñeko atalen mapan: hiriburuko iparraldekoetan EH Bilduk ditu emaitza onenak, eta UPNk hegoaldekoetan.
