Euskara
Kontseiluak 'Sorionekuak' mobilizazioan parte hartzera deitu du
Herri mobilizazioa ekainaren 10ean izanen da, Iruñean.
Sorionekuak, euskara nafar guztiona egitasmoak herri mobilizazio bat eginen du ekainaren 10ean, 17:30ean, Iruñean. Manifestazioa arratsaldean izanen bada ere, egun osoko egitaraua aurkeztu dute, «ospakizun erraldoi» bat egiteko. Euskalgintzaren Kontseiluak atxikimendua eman dio egitasmoari, eta mobilizazioan parte hartzeko deia egin du. Kontseiluak erran du euskararen ofizialtasunak «inori eskubideak kendu bainoago, ez dituenari aitortzen» dizkiola.
Ikusi gehiago: 'Sorionekuak' aurkeztu dute, «euskara ez baita museoko pieza»
Hala, egitasmoko kideek behin eta berriz adierazi izan dute euskaraz bizi nahi duten herritarrak direla, baina egunero hamaika traba aurkitzen dituztela horretarako. Oztopo horietako bat da zonifikazioa, zeinaren ondorioz «Nafarroako eremu handienean bigarren mailako herritar» bihurtzen diren; hortaz, «ardura politikoa» eskatzen dute. Alde horretatik, egitasmoak «eskubideak errespetatu, herritar guztien arteko berdintasuna bermatu eta harrotasuna zabaltzeko deia egiten» duela nabarmendu dute.
Mobilizazioa, baina, ez da salaketa eguna soilik izanen, euskara etorkizuna dela nabarmentzeko momentua ere izanen da, nafar guztiena: «Euskara ez delako inork hona ekarritako zerbait; galde diezaietela, bestela, Irulegiko bizilagunei».
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
