Maiatzaren 4an SDR enpresak, Amazonek Gipuzkoan azpikontratatuta dituen hiru enpresetako batek, lurraldeko langile guztiak kaleratzeko prozesua abiatu zuen, EEE enpregua erregulatzeko espediente baten bitartez. ELA sindikatuak jakinarazi duenaren arabera, akordiorik gabe amaitu da EEEa, eta, beraz, langile guztiak kaleratu dituzte. Sindikatuak dio SDRk Amazonek erabakitakoa bete duela, eta erakunde publikoek izan duten permisibitatea salatu du.
Amazonek SDR eta beste bi enpresa ditu azpikontratatuta Gipuzkoan, eta, ELAren ustez, hiru horiek ezaugarri komun batzuk dituzte: «miseriazko soldatak» eta «arauketarik eza eta malgutasuna»; «Amazonek egiturazko bihurtu nahi du berarentzat lan egiten duten azpikontratetako langileak miseriazko soldatetara kondenatuta egotea arautu gabeko lanaldietan».
Eusko Jaurlaritzaren Lan Sailari eta Lan Ikuskaritzari erantzukizuna beraiena dela leporatu die ELAk, eta Amazonen ereduari jarraitzen dion enpresa kultura hori nagusi izan ez dadin neurriak hartzeko eskatu du ELAk: «Amazonek lan merkatuaz egiten duen perbertsioak ezin du Euskal Herrian lekurik izan».
