Iragan asteko lehen bilkuraren ostean, gaur 17:00etan aurrez aurre izan dira berriz PSNko eta Geroa Baiko ordezkariak.
«Lanean jarraitzen dugu, Nafarroako erakundeak eta gobernua osatzeko bidean aurrera eginez eta aurreko legealdiko lanari segida emateko asmoz». Ordubete pasako bilera egin ostean, Geroa Baiko Uxue Barkosek komunikabideei azaldu die sozialistak prest daudela Nafarroako Parlamentuko hurrengo lehendakaria berriro ere Geroa Baiko hautagaia izateko.
Barkosen arabera, PSNk ontzat jo du legebiltzarreko mahaiak «Nafarroako aniztasuna aintzat hartzea», eta, ondorioz, horrek esan nahi du mahaiko kideetako bat EH Bildukoa izango dela.
Maria Txibite lehendakarigaiak, berriz, behin eta berriz nabarmendu du bere alderdiaren «eskuzabaltasuna». Dena den, Geroa Baikoei gogorazi die eskuzabaltasun horrek «bi aldekoa» izan behar duela. «Gure Antolamendu idazkariak, Ramon Alzorrizek, helarazi die akordioetara heltzeko eskuzabalak izango garela, eta, ondorioz, parlamentuko presidentetzan amore eman dugu, aurrera egin asmoz».
Dena den, oraindik ez dago akordiorik parlamentuari dagokionez. Oraindik ere beste xehetasun batzuk lotzea falta da. Adibidez, nor izango den parlamentuak hautatu ohi duen senatari autonomikoa. Ekainaren 16ra arteko epea dute alderdiek guztia lotzeko.
Ez dute azkenerako utzi nahi
Barkosek azpimarratu du ordurako etxeko lanak eginda eduki beharko dituztela. Izan ere, mahaiko kideak hautatzeko prozesua adin mahaiak zuzenduko du, eta egun horretan behin-behineko presidentea Voxeko parlamentarietako bat izango da, zaharrena baita. Horregatik, 2019an gertatu zen bezala, Barkosek ez du azkenerako utzi nahi akordioa: «Oso garrantzitsua da hori, kontuan harturik nortzuk dauden adin mahaian, eta horrek arduraz jokatzera eraman behar gaitu». .
Udalak osatu bezperan, ekainaren 16an, hautatu beharko dituzte taldeek Parlamentuko Mahaiko bost ordezkariak: lehenik, lehendakaria; jarraian bi, presidenteordeak; eta, azkenik bi idazkariak. Bozketaren dinamika kontuan harturik, Geroa Baiko hautagaia izango da presidentea; presidenteorde lehena PSNkoa izango da, eta bestea, UPNkoa; azkenik, idazkari bat eskuineko alderdietakoa izango da, eta bestea, EH Bildukoa.
Ikusi gehiago:2019an parlamentuko mahaia osatzeko prozesua
Geroa Baik ez du oraindik argitu nor izango den bere hautagaia, baina, iragan astean esan bezala, Barkosek adierazi du Unai Hualde jeltzalea «presidente aparta» izan dela amaitu berri den legealdian.
Bi alderdiek azaldu dutenez, euren asmoa da parlamentuko osaera ixtea, eta ondoren sartuko dira gobernuaren inguruko negoziazioetan: lehenik, hurrengo lau urteetako gidalerroak adostu nahi dituzte, eta ondoren gobernuaren osaera bera. Prozesu horri begira Txibitek zein Barkosek azaldu dute «ahalik eta azkarrena» itxi nahi dutela hitzarmena, baina hori baino garrantzitsuagoa dela akordio ona izatea.
EH Bildu, kanpoan
EH Bildu elkarrizketetatik at geratu da, 2019an bezala. Gobernua osatzeko prozesua burutzeko eta bere inbestidura aurrera ateratzeko, koalizio abertzalearen abstentzioa beharko luke Txibitek, bai edo bai; baina sozialistek argi utzi nahi izan dute prozesu horretan ez dutela EH Bilduk parte hartzerik nahi. Txibitek berretsi du ez duela arazorik alderdi guztiekin hitz egiteko, baina gaineratu du gobernuaren osaerari buruzko elkarrizketetatik at geratuko direla.
PSNk argudiatzen du legealdi osoan EH Bildurekin egindako akordioak «puntualak» baino ez direla izan, eta kanpainan mezu hori errepikatu dutela. Dena den, argi dago Espainiako Gorteetarako hauteskundeen gertutasunak zerikusi handia duela. Gainera, PSNk ez du erlazionatu nahi prozesu hori ekainaren 17an erabakiko diren udaletako alkateen kargu hartzeekin.
Alderdi guztiekin hitz egiteko arazorik ez duela irudikatzeko, Txibitek baieztatu du ostegunean, 09:00etan, UPNko Javier Esparzarekin biltzeko asmoa duela parlamentuan bertan.
