Maurizia etxe okupatua hustu egin du Poliziak

Aurreikusten zuten, eta iritsi egin da. Baionako Maurizia etxe okupatua hustu egin du Poliziak goizaldean. Frantziako Poliziak baliabide handiak erabili ditu operazio horretan. Gutxienez hamabi furgoneta eta dozenaka agente baliatu dituzte eraikina husteko eta bertan bizi zirenak kanporatzeko egindako operazioan.

Atzo bertan agerraldia egin zuten Maurizia proiektuko bultzatzaileek, goizaldean zer gerta zitekeen aurreikusita. «Kanporatzen bagaituzte, okupazio dinamika bat hasiko dugu», iragarri zuten. Goizean, kanporatu ahala, Baionan zabaldu da albistea, eta hainbat auzokide joan dira etxe okupatuko kideei babesa erakustera.

Elkarretaratzea 18:30ean

Mauriziako gazteek elkarretaratzera deitu dute arratsalderako, eta 18:30ean egin dute protesta, Baionako herriko etxearen aurrealdean. Jende ugari elkartu da, eta Maurizia proiektuaren aldeko kartelak banatu dira. Jean Rene Etxegarai Baionako auzapezari leporatu diote ez duela bete aurretik hartutako engaiamendua, «prentsari adierazi dionaren aurka».

Etxea hustu aurretik, Etxegaraik jendaurrean adierazi du «zuzenbide estatua errespetaraztera behartua» dela. «Bai, bere interes propioetarako zuzenbide estatua. Non dira gure eskubideak, gure aterpetzeko eskubidea, auzibidez gure burua defendatzeko eskubidea?», galdetu diote gazteek elkarretaratzean.

Etxe kanporatzearen atzean egotea leporatu diote. Gazteek salatu dute etxebizitzaren problematika tokiko errealitate bat dela, eta nabarmendu dute «bortizkeriarik gabeko alternatiba zentzuduna» proposatu dutela, «elkartasuna eta partekatzea erdigunean dituena eta alokairu kontratu baten bidez kudea zitekeena». Haien ustez, Baionako Herriko Etxeak bere boterea erabili du bederatzi gazte kanporatzeko. «Non dago bortizkeria? Baiona erdiguneko 10.000 metro koadroko eraikin bat hutsik uztea ez al da bortizkeria?».

Bestalde, FSU 64, LAB eta Solidaires sindikatuek ohar bateratu batean adierazi dute kaleratzeko eman den arrazoia, segurtasunari loturikoa, ez dutela sinesten. Aitzitik, salatu dutenez, «indarkeria erabiliz Macron eta Etxegarai jaunen alderdiaren neoliberalismoaren alternatiba den proiektua isilarazi nahi izan dute, bere osotasunean». Elkartasun osoa adierazi diete kaleratutako gazteei. «Etxebizitzaren arazoa ezin da konpondu apaintzeko neurrien edo polizia operazioen bidez».

Maiatzaren 16an jakinarazi zuten Baionako Santa Ursula karrikako eraikin bat okupatzen ari direla, bizitegien arazoari erantzun eta denei irekitako espazio soziokultural bat proposatzeko. Ekintzaileen hitzetan, 2015etik hutsa da egoitza. EPFL Ipar Euskal Herriko Lurraren Erakunde Publikoak erosia du orubea, Euskal Hirigune Elkargoarentzat. Baionako Herriko Etxearekin mintzatu dira, eraikina erabiltzeko aukerak aztertzeko. Auzitegiak, baina, emana zuen lekua husteko agindua, eta goizaldean gauzatu dute.