Albistea entzun

politika

ETAk bi guardia zibil hil ditu Mallorcan, haien autoa leherrarazita

Hildako agenteetako bat Iruñekoa da, Diego Salva, eta Burgoskoa bestea, Carlos Saenz. Ez dago zauriturik. Atentatua gertatutako lekutik bi kilometrotara Guardia Zibilaren auto batean beste bonba lapa bat aurkitu dute eta indargabetzen ari dira.

Berria -

2009ko uztailak 30

ETAk bi guardia zibil hil ditu Calvian (Mallorca, Herrialde Katalanak); Diego Salva (Iruñea; 28 urte) eta Carlos Saenz (Burgos, Espainia; 27 urte). Bi hildakoak zihoazen autoa Guardia Zibilaren kuartel aurretik igaro denean eztandarazi dute lehergailua, berri agentziek zabaldu dutenez. 13:30ak eta 13:45 artean izan da leherketa. Atentatua gertatutako lekutik bi kilometrotara Guardia Zibilaren auto batean beste bonba lapa bat aurkitu dute eta poliziak indargabetzen ari dira.

Atentatua egiteko moduari dagokionen nahasmendua nagusitu da lehen orduetan, lapa-bonba bat aipatu dute lehenik, eta patruila igarotzean leherrarazitako bonba batez hitz egin dute gero. Ramon Socias Espainiako Gobernuak Balear Uharteetan duen ordezkariak egindako agerraldian, berriz, lapa-bonba bat izan dela baieztatu du, eta urruneko kontrol bidez aktibatu dutela.

Aireportuak eta portu itxita 

Leherketa gertatu eta berehala, Guardia Zibilak inguruak itxi ditu, eta herritarrak bi kilometro eta erdiko segurtasun perimetro zabaletik kanpora bidali. 16:00ak aldean, berriz, Espainiako Gobernuak Balear Uharteetan duen ordezkariak jakinarazi du, Palmako aireportua eta portua ez ezik, Balear Uharteetako aireportu guztiak itxi dituzte 16:00etan, atentatuaren egileek ihes egitea saihesteko. Palmako aireportua 17:55ean ireki dute. Errepideetan ere kontrol zorrotzak jarri dituzte, batik bat Mallorcako uhartea zeharkatzen duten autobide nagusietan. Horrek, auto ilada luzeak eragin ditu.

Atentatua gaitzesteko ekitaldia egingo du Mallorcako Gobernuak bihar 13:00etan, Calviako Guardia Zibilaren kuartelaren aurrean. Lehen aldia da ETAk Balear Uharteetan norbait hiltzen duela, baina 1991 uztailaren 30ean bi atentatu egin zituen Mallorcan eta bi lagun zauritu ziren. Gainera, 1995ean ETAko hiru kide atxilotu zituzten uhartean, Espainiako erregearen kontrako atentatu saioa egitea egotzita.

Zauriturik ez 

Osasun zerbitzuek atentatua izan segituan jarri dituzte martxan zaurituak artatzeko guneak. Hainbat karpa jarri dituzte, eta zainketa intentsiboko unitatea duten bi anbulantzia ere bertaratu dira. Hasieran zauritu larriez hitz egin duten arren, zauriturik ez dagoela baieztatu dute arratsaldeak aurrera egin ahala.

Calvia herria turista askoren jomuga da Mallorcako uhartean, uharteko bigarren herri handiena da Palmaren atzetik, eta neguan 50.000 biztanle izatetik 200.000 biztanle izatera igarotzen da udan.

Atzo goizean ETAk bonba-furgoneta zartatu zuen Burgosen (Espainia), Guardia Zibilaren kuartelaren ondoan eta guztira 65 lagun zauritu ziren.

50 urteetan ETAk 206 guardia zibil hil ditu.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

Otegi, EH Bilduren II. Kongresuko itxiera ekitaldian, zuzendaritzako kideekin batera. ©Jaizki Fontaneda / Foku

EH Bilduk «askotariko ezkerra batzeko» ahalmena duela esan dute Kongresuaren itxieran

Berria

Otegik adierazi du EH Bilduk egungo eredu «gris, agortu eta tristea» eraldatzeko asmoa duela, eta militantziaren garrantzia goretsi du.

 ©ISABELLE MIQUELESTORENA

Bizi osoa lurrarekin eta herriarekin engaiatuta

Edurne Begiristain

ELB sindikatuaren sortzaile, Euskal Herriko Laborantza Ganberaren sustatzaile eta azken urteetan bake prozesuaren eragile nagusietako bat izanikoa atzo hil zen, eritasun larri baten ondorioz. Berria jakin eta berahala zabaldu ziren atsekabe mezuak.

<b>Batasunaren aurkako operazioa.</b> Herritar ugari Batasunaren Bilboko egoitza babesten, 2002ko abuztuaren 27an. ©MARISOL RAMIREZ / FOKU

Areatzaren bi aurpegiak

Jon O. Urain

Bi eserialdi, aski diferenteak. 2002ko abuztuan, Batasunaren egoitza babesteko eserialdia egin zuten herritarrek Bilboko Areatzan; legez kanpo jarduteko ziklo bat abiatzekoa zen. Bederatzi urte geroago, ia gune bereko beste eserialdi batek irudikatzen du Bilduren legeztatzea. Tartean, Alderdien Legea eta ondorio ugari.

Elkarlanak indarra

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna