Zabalgarbi errauste plantaren (Alonsotegi, Bizkaia) bigarren lerroaren proiektua bertan behera uzteko asmoa azaldu dute gaur goizean Bizkaiko Batzar Nagusietan, horretarako nahikoa zabor ez dagoelako. 2007tik geroz eta zabor gutxiago sortzen dela jaso du Cimas enpresak txosten batean, eta gaur aurkeztu du Batzar Nagusietan.
2007ra arte gora egin zuen zaborren sorrerak, eta urte horretan 696.091 tona hiri hondakin jaso zituzten. 2011n, berriz, 588.807 tona jaso ziren. Jaitsiera hori krisi ekonomikoak eta kontsumoaren beheratzeak azaltzen dutela dio txostenak, baita erakundeek aurrera daramatzaten prebentzio politikek ere.
