Albistea entzun

Hauteskunde elkarteak sustatzea ez dela delitua dio epaiak

D3M eta Askatasuneko auzipetuek ez dutela deliturik egin dio Auzitegi Nazionalaren epaiak. Auzipetu batzuek alderdi eta hautesle elkarte horiekin lotura dutela frogatutzat eman arren, "ideologikoki ezker abertzalearekin lotutako hautagaitzak sustatzea" ez dela delitua dio, baizik eta "parte hartze politikorako eskubidea" dela.

Oihana Elduaien -

2012ko ekainak 18

Manuela Fernandez Prado eta Ramon Saez Valcarcel Espainiako Auzitegi Nazionaleko epaileek sinatutako epaiak frogatutzat ematen du Askatasuna eta D3Mren sorreran ezker abertzalearen estrategiaren baitan daudela, baina ohartarazten du alderdi eta hautesle elkarteak legez kanpo uzten direnean horrek ez diola eragiten bertako kideei, haiek bere eskubide politikoak mantentzen dituztela, eta baita sufragio aktibo eta pasiborako eskubideak ere.

Beraz, auzipetuen eskubidea zela hautesle elkarteak zein alderdiak sustatzea, eta haietako hautagai izatea, "aurretik legez kanporatutako alderdiren batekin lotura izanagatik ere". Hau da, "ideologikoki ezker abertzalearekin lotutako hautagaitzak sustatzea" ez dela delitua, baizik eta "parte hartze politikorako eskubidea" dela.

Halaber, epaiak dio D3M eta Askatasuna sustatzen aritu zirenek jakinaren gainean eta kontzienteki ETAri laguntzen ari zirela ez dela frogatu, eta hori frogatu ezean, auzipetu horiek ezin direla zigortu ETAko kide edo haren laguntzaile izatea egotzita. "Tribunalak ez dauka nahiko elementu, zalantzarako tarterik gabe, auzipetuak ezker abertzaleari ez ezik ETAri berari laguntzen ari ziren konbetzimendura iristeko. Erakunde armatuarekin loturarik ez da topatu".

Epaiak dio legez kanporatzearen eragina gutxitzera bideratuta dauden hautagaitzak sortzea "ETAk sustatuta" egongo dela, "edo gutxienez haren interesekoa" izango dela. Gaineratzen du ulertzekoa dela erakunde armatuak bertako kideak alderdi edo hautesle elkarte horietan sartu nahi izatea, "bere presentzia eta kontrola ez galtzeko". Baina gaineratzen du ezin dela esan hautesle elkarte edo alderdi horietako kide guztiak ETAkoak direnik.

Nicolas Poveda magistratua ez dago ados epaiarekin, eta boto partikularra idatzi du, auzipetuak zigortzearen alde.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.