Albistea entzun

aita santuaren aukeraketa

Jorge Mario Bergoglio argentinarra da aita santua

76 urte ditu, eta jesuita da. Frantzisko I.a izango da. Latinoamerikako lehen aita santua da, eta historiako 266.a. Arratsaldeko zazpiak aldera atera da ke zuria. Kanpai hotsak entzun dira Done Petri plazan lehenik, eta musika bandaren hotsak gero. Milaka lagun bildu dira plazan.

Jorge Mario Bergoglio argentinarra da aita santua
Jorge Mario Bergoglio argentinarra da aita santua

Berria -

2013ko martxoak 13

Benedikto XVI.a izan du gogoan Frantzisko I.ak jende aurrean egindako lehen agerraldian. Haren alde otoitz egiteko deia egin du, eta plazan bildutako guztiek otoitz egin dute elkarrekin. "Espero dut gaur hasten dugun bide hau emankorra izatea Elizarentzat", esan du. Laburra izan da haren agerraldia.

Jorge Mario Bergoglio argentinarrak (Buenos Aires, 1936) Frantzisko I.a izena hartu du. 1936ko abenduaren 17an jaio zen, italiar jatorriko familia batean. Ingeniari kimiko gisa graduatu zen, baina apaiz sartzea erabaki zuen gero. Villa Devoto seminarioan aritu zen fraidegai. Filosofia lizentziaduna ere bada, eta Santa Feko eskola batean literatura eta psikologia eskolak eman zituen 1964 eta 1965 bitartean. Teologia ikasketak egin zituen 1967tik 1970era.

1969ko abenduaren 13an apaiztu zen, eta geroztik luzea izan da haren ibilbidea; tartean, Buenos Airesko artzapezpikua izan da. Joan Paulo II.a hil ondoren, bera izan zen kargua hartzeko hautagaietako bat —Joseph Ratzingerrek hartu zuen kargua orduan—. Bergoglio bozkatuenetan bigarrena izan zen.

Bere ibilbidean, polemika piztu zuten sexu berekoen ezkontzaren gainean egindako adierazpenek. 2010eko uztailean, ezkontzaren lege proiektua onartzear zirela, Bergogliok esan zuen "deabruaren mugimendua" zela proiektu hori. Nestor Kirchner Argentinako presidente ohiak Elizaren "presioak" salatu zituen gai horren gainean.

Bi jesuitaren desagerpenarekin ere lotu izan dute Bergoglio. Diktadura garaian, Francisco Jalics eta Orlando Yorio apaizak bahitu zituzten, eta, auzian zerikusia izan zuelakoan, deklaratzera joateko eskatu zuten hainbatek.

Hainbat libururen egilea ere bada Bergoglio. Meditaciones para religiosos (1982), Reflexiones sobre la vida apostólica (1986) eta Reflexiones de esperanza (1992) idatzi ditu, besteak beste.

Ke zuria, 19:00 aldera

Aita santu berria hautatzeko ados jarri dira 115 kardinalak Sixtoren Kaperan, Vatikanoan, ke zuria atera baita tximiniatik. Beraz, Benedikto XVI.a aita santuaren ordezkoa aukeratua zuten: Jorge Mario Bergoglio argentinarra. Jean Louis Tauran kardinala Done Petri basilikako balkoira atera da izenaren berri ematera.

Txaloka eta oihuka hasi dira Done Petri plazan bildutakoak ke zuria ikusi bezain pronto. Malkoak, poza eta besarkadak ikusi dira han bildutakoen artean. Viva il Papa leloa zuten pankartak eta hainbat herrialdetako banderak astindu dituzte fededunek; Polonia, Errumania, Espainia, Argentina, Italia eta Brasilgo banderak, besteak beste.

25 ordu aukeratzeko

Atzo elkartu ziren aurrenekoz kardinalak; ke beltza atera zen, lehen bozketan inork ez baitzituen beharrezko 77 botoak eskuratu. Gaur ere goizeko bi bozketetan ez dute inor aukeratu, eta ke beltza atera da. Orotara, 25 ordu behar izan dituzte aita santua hautatzeko.

Gaur 17:30-18:00etarako espero zen ke zuria ateratzea, eta ordu horretarako fumata zuririk ez bazegoen, beltza izango zela uste zen. Beraz, gehienentzat ezustean heldu da ke zuria.

 

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Irizpidea duzulako. Giroan zabiltzalako.

Zuk badakizulako.

Albiste gehiago

Aleksandr Litvinenko errusiar espioi ohia, 2006ko azaroan, pozoitua izan eta egun gutxira, Londresko ospitale batean. ©EFE

Litvinenko Errusiak hil zuela ebatzi du Giza Eskubideen Europako Auzitegiak

Gorka Berasategi Otamendi

Espioi ohia Londresen hil zen, 2006. urtean, polonioarekin pozoituta. Erresuma Batuak aitortua zion asilo politikoa.

Joe Biden AEBetako presidentea, Nazio Batuen Erakundearen Batzar Orokorrean. ©TIMOTHY A. CLARY / EFE

Biden: «Historiako inflexio puntu batean gaude»

Julen Aperribai

AEBeko nazioarteko harremanak sendotu dituela azpimarratu du NBEren Batzar Orokorrean, eta horretan jarraitzeko dei egin du. Haren gobernua Asia ekialdera begira dagoela onartu du, Txina aipatu gabe, baina arazoei modu «baketsuan» heltzeko prest dagoen edonorekin hitz egiteko prest agertu da.

Justin Trudeau lehen ministroa, eta haren emazte Sophie Gregorie, atzo, Montrealen. / ©Eric Bolte, EFE

Trudeau lehen ministroaren alderdiak irabazi ditu bozak, baina gehiengorik gabe

Arantxa Elizegi Egilegor

Hirugarrenez hartuko du agintea Alderdi Liberalak. Alderdi Kontserbadoreak boto gehiago eskuratu arren, liberalek baino ordezkari gutxiago izango ditu.

<b>Zenbaketa.</b> Tokiko hauteskunde batzordeko kideak botoak zenbatzen, igandean, Moskun. ©MAXIM SHIPENKOV / EFE

Putinek gehiengo osoa berritu du parlamentuan, iruzur salaketa artean

Arantxa Elizegi Egilegor Gorka Berasategi Otamendi

Errusia Batua alderdiak botoen erdiak eskuratu ditu, eta ordezkarien bi heren izango ditu behe ganberan. Errusiako Alderdi Komunista izan da bigarrena

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.