Mundua

Madurok proba gainditu du

Udal hauteskundeak izan dira Venezuelan, baina Nicolas Maduro presidentearen eta oposizioaren indarrak neurtzeko hitzordua ere izan da. Chavezen ordezkoa atera da garaile, baina Henrique Caprilesek hiri garrantzitsuenetako alkateak eskuratu ditu.

Amagoia Mujika Tolaretxipi.
2013ko abenduaren 9a
14:32
Entzun

Chavistena izan da atzoko garaipena, 5,1 milioi boto eskuratuta (%49,2). Oposizioak, berriz, 4,4 milioi bildu ditu (%42,7). Emaitza horiei esker, Nicolas Madurok arnasa hartu du tarte baterako, MUD Batasun Demokratikorako Mahaiak, oposizioa batzen duen koalizioak, Maduro boteretik kentzeko urrats gisara hartu baititu hauteskundeok. 337 alkate aukeratu dituzte, baina presidentea hautatzeko bozen itxura izan dute.

Oposizioaren asmoa zen bozak irabaziz gero Maduro boteretik kentzeko kanpainari ekitea. Konstituzioak ezartzen dituen urratsak egin, eta 2016rako erreferendum bat proposatzea. Ez du nahia lortu, baina horretarako aukera oraindik ez du galdu. Oraingoz chavisten indarra handia da, baina oposizioa lekua egiten ari da, eta Capriles arerio serioa gertatzen ari zaio Madurori. Botoetan gorantz egiten ari da oposizioa etengabe.

Boz hauetan oposizioak bereganatu ditu hiri garrantzitsuenak. Caracasko alkatetzari eutsi dio, Maracaibokoari ere bai, eta, horrez gainera, bere egin ditu Valencia, Maturin, Barquisimeto eta Barinas.

Chavez gogoan

"Urtebetera Chavez presidenteari esan diezaiokegu aberria dugula oraindik, etorkizunerako aberria", azaldu du Madurok, pozik, emaitzak jakin bezain pronto. Duela urtebete agertu zen Chavez azken aldiz jendaurrean, eta egun hori baliatu dute, hauteskunde eguna hain zuzen, Hugo Chavezekiko Leialtasunaren Eguna ezartzeko. Oposizioak hori salatu du hauteskunde eguna bera ere kanpaina egiteko erabili duelako gobernuak. Chavezek oraindik itzal luzea du, eta kanpaina osoan izan da presente, gobernuko ordezkarien aldetik, baina baita oposiziokoen artean ere.

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.