Katalunian autodeterminazio erreferendum bat egiteko bidean bilera garrantzitsua egin dute Bartzelonan erabakitzeko eskubidea gauzatzearen alde agertu diren alderdiek. Batzar bat egin dute Artur Mas Kataluniako Gobernuko presidenteak, ERCko Oriol Junquerasek, ICVko Joan Herrerak, EUiAko Joan Menak eta CUPeko David Fernandezek eta Quim Arrufatek.
Bi galderako erreferenduma egitea adostu dute alderdiek. Horietako bat da: "Nahi al duzu Katalunia estatu bat izatea?". Bigarrena zehatzagoa izango da, eta aurrenekoari baiezkoa erantzutekotan erantzun beharrekoa izango da: "Nahi al duzu Katalunia estatu independente bat izatea?". Azaroaren 9rako deituko dute erreferendumera.
Lehen galderak ez luke zehaztuko zer-nolako estatua izan beharko lukeen Kataluniak, eta ICV eta UDCren eskaerak asetuko lituzke horrela. Bigarren galderarekin, berriz, independente hitza txertatuta, CUP eta ERCren nahiei men egingo lieke Masek. Alderdietako zuzendaritzek berretsi beharko dute orain akordioa.
Masen esanetan, galdera eta data adosteaz gain, erreferenduma egiteko prozedura ere zehaztu dute. Masek esan du datorren astean jarriko dutela martxan prozedura hori. Joan Herrerak azaldu duenez, lege proposamen bat abiatuko dute Kataluniako Parlamentuan, eta, bertan onartuta, Espainiako Kongresura eramango dute gero, bertan onar dezaten erreferendumaren deialdia. Hala ere, erreferendumik ez duela baimenduko ohartarazi du berehala Espainiako Gobernuak.
Galdera "barneratzailea"
14:00etan agerraldi bat egin du Artur Masek, akordioaren inguruko xehetasunak emateko. Azaldu du akordio "azkarra" izan dela, bi egunetan heldu baitira adostasunera. Halaber, adostutako galderak "barneratzaileak" direla nabarmendu du, eta, zentzu horretan, PSCk ere erreferendum deialdiarekin bat egitea espero du.
Junquerasek hitz egin du hurrena, ERCren jarrera azaltzeko. Esan du ERCk ez lukeela nahi galdera "hain luzea" izatea, baina azaldu du estatu independenteaz galdetzea ezinbestekotzat duela ERCk, eta adostutako galderak hori ziurtatzen duela.
"Autonomia erkidegoen Espainia amaitu da", esan du Joan Herrerak (ICV). Ontzat jo du erreferendumeko galdera, iritzita federalistak eta autonomistak barnebiltzen dituela. Akordioa "ona" dela uste du, galdera "argia eta barneratzailea" delakoan, eta PSCri ere akordioarekin bat egiteko eskatu dio. Herrerak, gainera, uste du "prozesu konstituziogile" bat martxan jartzen duela erreferendumak.
CUPeko Quim Arrufatek ere ontzat jo du Artur Masen proposamena, baina gaineratu du gizartea dela erreferendumari oniritzia eman behar diona, "hura izan baita prozesu hau abiatu duena".
