Arazoak arazo, beti aurrera

Frida Kahlo Mexikoko margolari izan zenari buruzko Frida haurtxoa antzezlana izango da ikusgai gaur, Bilboko Alondegian. Pairatutako gaixotasunak eta gaztaroan izandako arazoak hartzen ditu oinarritzat. Umeentzako antzerkia izango da.

Hutsik dagoen mihise baten aurrean, Kahlok bere iragana gogoraraziko du. «Nire aitaren begiak eta nire amaren gorputza ditut», dio mihisearen aurrean, ispilu bat balitz bezala. Jaiotzaren eguna, 6 urterekin izan zuen polio gaixotasuna, izan ez zituen lagunak, istripua... bizitzan izan zituen une gogorrenak gogoratuko ditu. Arazo guztien gainetik, baina, mezu bat bidaltzen du antzezlanak: bizitzeko gogoa. Une oro aurrera egiteko grina izatea eta arazoen aurrean bizitzaren edertasuna zenbaterainokoa den jabetzea. Horixe da Frida haurtxoak duen mezu nagusia.

Kahlo margolariaren bizitza jaio bezain laster izan zituen gaixotasunek markatu zuten. Guztira, 32 aldiz operatu zuten, eta 18 urterekin izan zuen istripuak etorkizunean ondorio larriak ekarri zizkion.

Antzezlana Alondegiko Arte Bizien programaren barne dago, eta Karlik Danza Teatro konpainiak egin du. Caceresen (Espainia) sortu zen, 1991n, eta urte horietan guztietan 1.500 emanalditik gora egin izan dituzte, 32 herrialdetan.

'FRIDA HAURTXOA'

Noiz. Gaur, 12:00etan.

Non. Alondegiko auditoriumean (Bilbo).