Ez da behar bezala hasi Bilboko Aste Nagusia. Ez, behintzat, Bilboko Udalak antolatutako egitaraua: atzo gauean kontzertu bana ematekoak ziren Kai Nakai, Olatz Salvador eta Maren artistak, baina bat bera ez zen igo eszenatokira, hori ezinezkoa baitzen. Eszenatokia ez zegoen muntatuta.
Udalak esan du «antolatzaileez gaindiko arrazoiengatik» geratu direla bertan behera kontzertuak, eta azaldu du arazo teknikoak izan zituztela eszenatokia jartzerakoan. Hiru artistek, berriz, adierazi dute «pena handiz» ez dutela jo kontzerturik, «ageriko motiboengatik».
Zenbait hedabideren arabera, udala aztertzen ari da eszenatokia muntatzeko ardura zuen enpresaren aurkako neurriak hartzea. Gaurko dena prest izatea espero dute; Guggenheim alboan kantatzekoak dira Janus Lester eta Dupla.
