Danbor doinuak baita Brooklynen eta Shanghain ere

Ez da Donostiako eta Azpeitikodanbor edo upel hotsik izango, baina Brooklynen (New York) dagoen Euskal Etxean elkartuko diren askok Euskal Herrian egongo balira bezala sentituko dute Sarriegiren San Sebastian martxa.

Bi eguneko atzerapenez iritsiko da egun handia New Yorken bizi diren donostiar eta azpeitiar askorentzat. Larunbatean ospatuko dute San Sebastian eguna Shanghain ere; desfilea egin, eta afaldu egingo dute Euskal Etxean.

80 bat lagun inguratuko dira New Yorkeko Euskal Etxera, eta, azken urteetan bezala, afariaren ostean, hain ezagunak diren doinuen erritmora, makilekin egurrezko taulak joko dituzte. Entsaiorik gabeko emanaldia dela kontuan izanda, eta afalosteko berotu aldiagatik edo norberak izan ditzakeen urduritasunen eraginez, kostako da ederki denak batera eta aldi berean erritmoa eramatea. Baina egun horretan hori izaten da gutxienekoa.

Santi Egaña donostiarra arduratu izan da orain arte zuzendariaren makila hartu eta afaldarrak gidatzeaz, eta aurten ere han izango da, eta zuzendari lana ederki beteko du.

Arratsaldeko zortziak aldera hasiko da Euskal Etxean San Sebastian eguneko afaria. Ordu batzuk lehenagotik arituko dira sukaldean dena prestatzen Jon Cerezal eta Amaiur Olaskoaga. Itsaso Auzmendiri eta Edurne San Sebastiani egokitu zaie aurten pintxe lanak egitea. «Afari ederra prestatuko dugu», esan du Cerezalek. Euskal Herriko toki gehienetan bezala angularik ez da izango New Yorken.

Ez ditu urte asko San Sebastian eguna New Yorkeko Euskal Etxean ospatzeko ohiturak. 2002an, Gaztelubideko abesbatza eta Juan Mari Abad danbor nagusiaren bisita jaso zuten, eta oparitan, egurrezko taulak eta makilak ekarri zizkieten. 2007an, San Sebastian egunez egokitu zen urtarrileko hilabeteari zegokion afaria, eta aukera ona iruditu zitzaien urte batzuk lehenago jasotako opariak estreinatzeko. Urte hartan entzun ziren lehendabiziko aldiz doinu ezagunak. Geroztik ez du ospakizunak etenik izan. Urtero egiten da New Yorkeko Euskal Etxean San Sebastian eguna, gertuen tokatzen den larunbatean. Eta, bertara biltzen den jende kopurua ikusita, ez dago ukatzerik New Yorken bizi diren euskaldunek egun hori gustuko dutela.