Urtero bezala, Mendizabaleko aparkalekua ume eta helduentzako toki berezi bihurtu da. Herrialde askotako janari postuak, tonboletan jokatzeko aukera, jaurtiketa jokoak eta adin guztientzako atrakzioak topatu daitezke han. Uztailaren 24an ireki zuten gunea, eta abuztuaren 10a arte gozatu ahal izango da horietaz.
Atrakzioen eremura sartu eta berehala ikus liteke Antojitos tonbola. Urteak daramatza Gasteizera etortzen, klasiko bat bilakatzeraino. Zail da handik pasatzea lurrera eroritako tonbolako paperak zapaldu gabe. Ainire deituriko ume bati tokatu zaio erruleta biratzea. Lotsati samar igo ditu eskailerak, eta indar guztiarekin bultza egin dio erruletari. Kukuxumusuren katilu sorta batekin bueltatu da etxera.
Mendizabaleko esparruan haur eta gaztetxoak dira nagusi. Edozein bazterretan ageri dira. Zotzak botatzeko postu baten aurrean daude anai-arreba batzuk, elkarrekin solasean. Zotz bat botatzea lortu berri dute, eta eztabaidan ari dira, ea zer sari aukeratu. Anaiak laserra aukeratu nahi du; arrebak, berriz: «Nik pilota argiduna nahi dut». Badirudi ez direla ados jarriko. Amak hartu beharko du erabakia, eta hor geratu da, epaile lanetan, zeini arrazoia eman zalantzan.
Arretarik handiena pizten duten atrakzioetako bat Rocket da. Hiru mutil gazte dabiltza begira, igo ala ez hausnartzen. Izan ere, aurten berritasun batekin dator: 360 graduko bira egitea nahikoa ez, eta aulkiak ere irauli egiten dira bidaia osoan. Ausartenentzat egindako atrakzioa da, gutxi batzuek soilik jasan ahalko baitituzte itzulipurdi horiek guztiak.
Errusiar mendia beti dago presente Mendizabalean. Raton Vacilon du izena, sagu isekaria alegia, eta izenak ez du gezurrik esaten. Bagoiak, errailetan zehar, mugimendu esperogabeak egiten ditu. Ama-alaba bikote batek garrasika igaro du ibilbidea, atrakzio azpian begira daudenek entzuteko moduan, katuaren aho erraldoiak irentsi dituen arte.
Adinekoak ere presente
Baina atrakzio eremuan ez daude soilik gazteak: adinekoak ere ikusten dira, arratsalde-pasa. Horien artean, alboko Caser egoitzako adinekoak. Beti egiten dute inguru horretan ibilaldia, eta jaietako zaratak eta musikak ez dizkie aldatu ohiturak. Egoitzako arduradunek lagunduta etorri dira, postuak ikusi eta zerbait jateko asmoarekin.
Gogotsu daude. «Oso goxo dago txurroa», esan dio adineko batek egoitzako arduradunetako bati. Garai batean, umetako ilusioarekin gozatzen zuten feriez; orain, beste modu batean gozatzen dute.
