Hilabete baino gutxiago falta da Bilboko inauteriei ongietorria egiteko: otsailaren 12tik 17ra izango dira, eta, oraindik behin betiko egitaraua jakinarazi ez duten arren, gero eta gauza gutxiago falta dira zehazteko. Izan ere, iragarri dute nor izango diren Farolin eta Zaranbolas, Bilboko aratusteetako protagonistarik garrantzitsuenak: Imanol Ituiño magoa hautatu du hiriko Jai Batzorde Mistoak Farolin harroa gorpuzteko, eta Mertxe Gil txotxongilolaria, berriz, Zaranbolas festazale baikorraren rola jokatzeko.
Bilboko Konpartsek orain dela 47 urte ekin zioten berriro aratusteak ospatzeari —konpartsak Jai Batzorde Mistoan daude—, eta duela 42 urte sortu zituzten pertsonaiok. Eta, ordutik, inauterien jarduera nagusietako bat da Farolin eta Zaranbolasen epaiketa. Aurten, otsailaren 13an egingo dute, Plaza Barrian. Aurreko egunean, otsailaren 12an, Ituiño eta Gil kalejiran abiatuko dira Arriaga antzokitik, 18:30ean, eta maskara trukea egingo dute iazko Farolin eta Zaranbolasekin: hau da, Josu Kamararekin eta Oihana Bartrarekin.
