Euskal bideojokoen bederatzigarren edizioa egingo dute azaroaren 7an, Bilboko La Perrera gunean. 09:45ean abiatuko dute eguna, eta 20:00etan amaitu. Lau hitzaldi eta mahai inguru bat antolatu dituzte euskal bideojokogintzaren esparru anitzak aztertzeko asmoz. Itzulpengintza eta euskara izango dira jardunaldiaren ardatzak, beste behin.
Jokotekniarentzat horren garrantzitsua denez, bideojokoen musika eta soinu bandak sortzeko prozesuan ere murgilduko dira, eta marrazkilaritza eta arte kontzeptualak ere landuko dituzte. Bideojokoen munduko langileen borrokan ere barneratuko dira, eta azken urteotako egoera gogorrari helduko diote.
Aurtengo berritasuna, ordea, euskal bideojokoen lehenengo azoka izango da. Euskal Herriko bideojoko estudioak eta sortzaileak elkartuko dira, lehenengoz, eta euren lanak ezagutaraziko dituzte.
