Ananaren eta litxiaren gustura hurbiltzen da kakao zukuarena. Kakao babak inguratzen duen zuntz likatsu zuria —muzilagoa— nahastuta ateratzen den likidoa da. Toki gutitan saltzen dela kontatu du Monsieur Txokola txokolategiko langile Pauline Raoutek. Aise jakin daiteke non dauden haien tailerra eta denda, urrundik usain baitaitezke. Baiona Ttipia zeharkatuz gero, kakao txigortuaren usaina segitu besterik ez da egin behar txokolategi ttipira arribatzeko. Dendako atea ireki eta jende franko dabil Pazko garai honetan, txokolatea erosten.
Gibeleko aldean kakao babak txigortzen ari dira txokolategile batzuk, baita altzairuzko ontzi handietan eman txokolatea moldeetan isurtzen ere. Ohikoa den bezala, plakak ez dira falta dendan. Txokolate beltza eta esnezkoa saltzen dituzte gehien, eta haien gibeletik datoz amandez eta kakahuetez eginikoak.
Orotariko plaken apalen ondoan, berriz, kakao zukuak eman dituzte bistan. Gustu «aski samina» du, baina, aldi berean, «fresko samarra» da, Raouten erranetan. «Pertsona batzuek sagar edo pasio fruituaren gustua sendi dezakete. Azken finean, edozein zuku bezalaxe edan daiteke, erraza da edateko».
Ekuadortik Euskal Herrira
Ekuadorko Papa Carlos kakaogilearekin lan egiten dute Monsieur Txokolan. Raoutek kontatu duenez, zukua ekoizteko prozesua «biziki» sinplea da. Kakao babak bildu ondoko 24 orenetan behar da muzilagoa nahastekatu zukua emanen duen ziropa ateratzeko, denbora joan ahala kakao oskolak xurgatzen baitu zuntzek duten materia guzia. Enpresak ziropa atera ondoan, Euskal Herrira izozturik igortzen du. Ondotik, Bardozeko Elikatxo enpresak (Lapurdi) errezibitu ziropari ura gehitzen dio, eta botilattoetan ematen ditu, salmentarako. «Ura gehituta, azken finean samina kentzen dio», hasi du azalpena Raoutek. «Eta zukua edangarriagoa bilakatzen du urak». Segurtatu duenez, zukuari ez diote azukrerik ematen, ezta bertze produkturik ere. «Zukua naturala da, ez du azukrerik behar, eta ez diogu deus botatzen, ahalik eta kalitate handieneko produktua nahi baitugu eskaini».
Bezeroek, oro har, «kuriositatez» behatzen diote zukuari. Dendan saltzeaz gain, zuku bihurtu aitzineko ziropa gozogintzako profesionalei ere saltzen diete. Azken finean, azukrea ordezkatzeko balia daitekeen produktua izanik, bixkotxak egiteko «bertze alternatiba bat» izan daiteke, Raoutek zehaztu duenez. Gozogintzarako ez ezik, koktelak egiteko saldu ohi dute kakao zukua. «Baionan berean kokteletan berezitua den ostatu batek erosten digu zukua. Hainbat errezeta proposatzen dizkigute, ezohiko koktelak ateratzeko xedea baitute gure produktua erosiz. Gauza biziki berriak eta onak atera daitezke». Monsieur Txokolak zuzenean «lau tona zuku» saltzen ditu urte guziz, eta, guti gorabehera, bertze hainbertze saltzen dizkie partaide dituen dendei eta gozogileei.
Kakaoaren gustuaren iruditeria «hausten» du zukuak. Kakaoaz arituz gero, txokolatearen gustua baizik ez da jiten burura. Alta, kakaoa kontsumitzeko manera «berri bat» eskaintzen du zukuak, eta «fruituaren egiazko gustua» erakusten du. «Jendeari kakaoa aipatzean, txokolate plaka etortzen zaio burura, baina kakao babaren egiazko gustua ez da halakoa, kakaoak hainbat etapa jasaten baititu txokolate izan aitzin». Raouten hitzetan, kakao fruituaren «egiazko gustua probatzeko parada» eskaintzen du zukuak. «Ondorioz, gure iruditeria hausten du produktu honek, eta horregatik da hain interesgarria».
