Kontxako sailkapena izango da gaur. Gainera, Arraunaren Olinpiada egingo dute irailaren 4an eta 11n, hurrenez hurren. Larunbatean ere egongo da zeregina, bi ekitaldi nabarmenduko direlako: Sagardo Eguna eta herri kirolak. Konstituzio plazan elkartuko dira Gipuzkoako 35 sagardo ekoizle, baita sagardozale andana ere. Muztioa nola egiten den erakutsiko dute plazan. Bestalde, Saguesen hainbat kirol proba prestatu dituzte: lokotx biltzea, trontza, aizkora, zaku eramatea...
Gastronomiak eta folkloreak ere euren tartea edukiko dute. Bulebarren egingo dute Basque Beer Fest jaialdia; marmitakoa (irailaren 9a) eta sardina jana (irailaren 11) egingo dituzte Sarriegi plazan. Esku dantza eta bertsolari jaialdia egongo dira larunbatean, Konstituzio plazan.
Kultur Hiriburutza gogoan
Aurten, Donostia Europako Kultur Hiriburua denez, horrekin loturiko ekintzak antolatu dituzte. Emakume erraketisten inguruko argazki erakusketa egingo dute bihar, Ramon Labaien plazan, eta hitzaldi bat izango da ondoren. Larunbatean, berriz, Euskal Herria Kantuz eguna ospatuko dute 700 lagun inguruk Donostiako erdialdean, eta emakume pilotarien topaketa egingo dute Bulebarrean.
Datorren asteari begira, Urkoren eta Bilboko Udal Bandaren kontzertua egongo da ostiralean, Konstituzio plazan. Egun berean, habanerak abestuko dituzte, euskaraz eta gazteleraz, portuan. Xabier Letek 1982an Txirritaz eginiko antzezlana egingo dute, berriz, bertsolaria hil zela 80 urte bete direlako.
