Musikak «mugarik ez» daukanez, nazioarteko talde ezberdinak gonbidatu dituzte antolatzaileek. Euren kantak plazaratzeko aukera edukiko dute Kurdistango, Irlandako, Portugalgo eta Espainiako hainbat musikarik. Folkaren bidez, badiak duen «kulturarteko aberastasunaz» ohartaraztea da jaialdiko antolatzaileen helburua. Hamaseigarrena izango da aurtengoa.
Hondarribian emango diete hasiera hiru eguneko kontzertuei, Arma plazan. 2012an Lapurdin sortutako Hinka taldeak kontzertua joko du, 20:30ean. Horren ostean, 21:00etan, Altan talde irlandarraren txanda izango da: azken hamabi urteetan, munduko musika tradizionaleko talderik ospetsuenetakoa da.
Portugalgo folka, indartsu
Bihar, Hendaiako Gaztelu Zahar frontoian egingo dituzte musika emanaldiak. Portugalgo Aqui Ha Baile taldeak eskainiko du lehena, 19:00etan. Horren ostean, Frank Lasuen eta Jose Luis Canal musikariaren txanda izango da, 20:30ean. Joao Afonso portugaldarrarena izango da eguneko azken kontzertua.
Igandean, jaialdiaren azken egunean, bi kontzertu egingo dituzte Irungo Urdanibia plazan. Kurdistango Gani Mirzok eta haren taldeak euren herrialdeko doinuak flamenkoarekin nahastuko dituzte, 20:00etan. Kanarietako (Espainia) musika tradizionala eskainiko du, azkenik, Benito Cabrerak, 21:00etan hasita.
