Istorioak bukaera borobila izan du. 2010ean, Dani Asuak negatibo sorta bat hartu zuen Madrilgo merkatuko zakarrontzi batetik; hamar urte geroago, irudiok errebelatu, eta balioa zutela ohartu ziren Asua eta haren lagun eta argazkilari Hibai Agorria; bildumarekin erakusketa bat taxutu zuten Gernikako Kultur Etxean, Non ote zaude —ostiralera arte izan da ikusgai—, argazkietan behin eta berriz ageri den neska gaztea topatzeko helburuarekin; eta berriki izan dute haren berri. 80 urte ditu orain, Elena du izena, eta Madrilen bizi da.
Familia baten oroitzapenak erakusten ditu bildumak: batik bat Bizkaiko herrietako argazkiak dira, orain dela 70 urte egin zituzten zenbait bidaiatan hartuak. Ageri dira Gernika-Lumo, Bermeo eta Bilbo, besteak beste. Baina Elorrio izan da Elena topatzeko hari muturra. Gernika-Lumon lan egiten duen baina Elorrioko senideak dituen irakasle bat joan zen erakusketaren inauguraziora, argazkien argazkiak egin zituen, eta herrian zabaldu ziren. Balendin Berriotxoa jaiegun bat ageri da irudietan; egun hartan, jaunartzeak ere izan ziren herrian. Talde argazki batean, protagonista eta haren lehengusina Carmen identifikatu zituzten: Carmenen jaunartzea zen, eta Elena eta haren familia Madrildik etorri ziren ospakizun horretan parte hartzeko.
«Carmen erakusketa ikustera etorri da. Konturatu gara hamabost argazkitan agertzen dela. Bera ere bada protagonista», nabarmendu du Agorriak. Haren bitartez jarri dira harremanetan Elenarekin. Istorioa borobilduta, hurrengo urratsa zera da: argazkiak eta negatiboak familiari itzultzea.
