«Euskal kulturaren alde» aritu eta Xalbadorrekin harreman zuzena izan zutenak ere omentzen dituzte azken urteetan. Eta aurten Jon Azpillaga bertsolari pasaitarra hartuko dute gogoan, otsailean hil zela eta. «Argazki askotan ageri dira bera eta Xalbador kantuan. Azpillagak kontatzen zuen 1960ko txapelketan ezagutu zuela, eta bizi izan zen artean izan zutela harremana», argitu du Iriondok. Bazkaldu ondorengo bertso saioan Joan Mari Narbaiza ere gogoan hartuko dute bihar.
Aurtengoa igaro gabe dela, datorren urtean Baxenabarreko bertsolariak omenduko dituztela aurreratu du Iriondok: hala nola Fermin Mihura —haren bertso-bilduma aurkeztu dute asteon—, Ernest Alkhat, Joanes Arrosagarai eta Jean Pier Mendiburu. Omenaldiak omenaldi, Xalbador Eguna «euskaltzaleen bilgune» izaten dela dio Iriondok, «herri oso bat euskaraz bizitzeko modua». Biltzen direnen artean, baina, Lapurdi, Zuberoa eta Nafarroa Beherekoak gutxiengoa direla dio.
Bertso saioa, bazkalostean
Egun handia bihar bada ere, gaur iluntzean kontzertua egingo dute elizan, eta elizan hasiko da biharkoa ere. «Sinesmendun jendea badago oraindik, eta meza jartzen dugu, hildako bertsolari lagunak gogoan». Frontoian lagunarteko bazkarian batuko dira goizeko ekintzen ondoren, eta Amets Arzallus, Sebastian Lizaso, Juan Jose Eizmendi Lodisaletxe eta Jose Luis Gorrotxategi bertsolariek kantatuko dute. «Askorentzat urruti egiten da, eta jendeak arin irten behar izaten du Urepeletik, baina erromeria plaza husten den arte egongo da».
