Eusko Jaurlaritzak Patataren Sektore Plana eta Patataren I+G+b Plana aurkeztu zituen alor horretako ordezkarien aurrean, martxoaren 5ean, Arkautin (Araba), 5. Akis Foroan, eta haien balorazio ona egin zuen. Ekoizleek, teknikariek eta kooperatibetako, enpresetako eta erakundeetako ordezkariek parte hartu zuten ekitaldi horretan, eta planaren ildo estrategikoen berri jakiteaz gain, proposamenak egiteko eta lehentasunei buruz mintzatzeko aukera ere izan zuten.
«Arkautitik mezu argi batekin ateratzen gara: konpromisoa dago, ezagutza dago eta elkarrekin aurrera egiteko borondatea dago. Patataren Plana luze irauteko eta etengabeko hobetuz joateko asmoz sortu da, egunero laborantza lantzen dutenen ikuspegia txertatuz», azpimarratu zuen Amaia Barredok, Eusko Jaurlaritzako Elikadura, Landa Garapen, Nekazaritza eta Arrantza sailburuak.
Jardunaldi horretan, Araban patatak dituen erronka nagusiak aztertu ziren, hala nola azken hamarkadetan patata ereiteko erregistratutako eremu murrizketa, presio fitosanitarioa edo inportatutako oinarrizko haziaren mendekotasuna, eta baita lurralde hori kalitatezko hazi ziurtatuaren ekoizle gisa indartzeko dauden aukerak ere.
Lankidetzaren bidetik
Planak estrategia egituratua planteatzen du ezagutzaren sustapenean, inbertsioen indartzean eta sektorearen aktibazioan oinarrituta. Helburua da patata ereiteko eremuen azalera handitzea, haren errentagarritasuna hobetzea eta Euskal Autonomia Erkidegoko baldintza agroklimatikoetara egokitutako barietate propioen garapena bultzatzea. Ildo horretan, Neiker zentro teknologikoak ikerketa aplikatuan eta hobekuntza genetikoan eragile gisa duen zeregina nabarmendu da, kooperatiba eta ekoizpen erakundeekin lankidetzan aritzeko.
5. Akis Foroa baliatu zen patataren sektoreko ordezkarien ikuspegien berri jasotzeko, eta bertan azpimarratu zuten ekoizpenaren, ikerketaren eta merkaturatzearen arloak ondo koordinatuta mantentzearen garrantzia, eta baita azaldu ere hobekuntzak egiten jarraitzeko asmoa.
Barredoren hitzetan, «foro honen benetako balioa entzutea izan da. Sailak sektorearekin batera lanean jarraitzeko konpromisoa hartzen du, tresnak ustiategien errealitatera egokitzeko eta Arabako hazitarako patatarentzat etorkizuna, errentagarritasuna eta egonkortasuna bermatuko dituen estrategia sendotzeko».
Jardunaldi horren bitartez, Eusko Jaurlaritzak hasiera eman dio planaren garapenaren fase berri bati, sektorearekin lankidetza aktiboan oinarrituta eta neurriak etengabe ebaluatuz, haien eraginkortasuna eta landa eremuan izango duten eragina bermatzeko.
