Espainiako estatistika erakundeak dio 151.100 lagun daudela lanik gabe Hego Euskal Herrian. Horietatik 73.200 Bizkaian daude (+5.400), Nafarroan 32.800 (-200), Gipuzkoan 28.500 (+2.000), eta Araban 16.600 (-3.300).
Duela urtebete baino 20.500 gutxiago dira langabeak. Jaitsiera horretatik hiru laurden biztanleria aktiboaren jaitsierari zor zaio (-15.200 azken urtean), lanean daudenak 5.400 gehiago baizik ez direlako. Azken hiruhilekoan, ordea, gora egin dute aktiboek (4.900).
Langabeen %53 emakumeak dira Hego Euskal Herrian (80.100), eta %47, berriz, gizonezkoak (71.000). Emakumeen artean langabezia tasa hiru puntu handiagoa da: emakumeen artean %12,88 daude lanik gabe, eta %9,94 dira gizonen artean. Orotara, langabezia tasa %11,31ra igo da lau lurraldeetan. Euskal Herri osoan apur bat apalagoa da, Iparraldean tasa txikiagoa delako. Gaindegiak aurki berrituko du bere datua.
Gipuzkoak du, Hegoaldeko lurraldeen artean, langabezia txikiena (%8,73). Azken hiruhilekotik hona, ordea, igo egin da (%8,18 zen orduan). Igo egin da Bizkaian ere (%12,54tik %13,42), eta hark du tasarik handiena. Araban asko jaitsi da (%13,05etik %10,95era), eta ia ez du aldaketarik izan Nafarroan (%10,55etik %10,52ra igaro da).
