Volkswagen lantegiko hainbat ataletako beharginek geldialdia egin dute gaur, Iruñeko Landaben poligonoko (Nafarroa) muntaketa lerroaren ondoan ari zen langile bat bat-batean hil dela eta. Ezbeharra goizeko hamarrak aldera izan da: osasun zerbitzuak gizona suspertzen ahalegindu dira, baina tokian bertan zendu da.
Langile batzordeko iturriek azaldu dutenez, atsedenaldiarekin batera egin dute geldialdia, 10:30 aldera, osasun zerbitzuak plantako habe nagusian ari zen langilea suspertzen saiatzen ari ziren bitartean, hiru ordu laurdenez. Ondoren, ordea, ordu biak arte lanuztearekin jarraitzea erabaki dute muntaketako, motorreko eta azken berrikuspeneko sailetan; pinturan eta txapa lantegian lanean jarraitu dute.
Nafarroako UGTk atsekabea adierazi du langilearen heriotzagatik, eta elkartasuna adierazi die haren lankide eta gertukoei. Nabarmendu duenez, beharginarena «heriotza naturala» izan da.
