Euriari eta eguraldi txarrari aurre eginez, 3.000 bulegotako langile inguruk manifestazioa egin dute Bilbo erdigunetik CEBEK patronalaren bulegora arte. Grebaren jarraipena “esanguratsua” izaten ari dela nabarmendu dute sindikatuetako ordezkariek; %60 ingurukoa. Hala ere, adierazi dute erakunde publikoei eskaintzen dizkieten zerbitzuetan -call center-ak, informatika euskarriak- gutxieneko zerbitzuak ezarri dizkietela.
Bizkaiko bulegoetako langileak 2012tik daude hitzarmen kolektibo gabe. Ordutik hona, kontratazio berrietan Espainiako hitzarmena ezarri dute. ELA, LAB, ESK, CNT eta CGT sindikatuek azken hitzarmen kolektiboa berritzea eskatzen dute. Sindikatuentzat, ezinbestekoa da, antzinatasuna eta gutxiengo soldatak igotzeko bermea mantentzea. CEBEKekin negoziazio mahaia ireki zuten iaz, baina, aurrerapausorik ez eman izana egotzi diote patronalari.
CEBEKok bulegoaren atarian patronalak Espainiako hitzarmenarekin “xantaia egitea” salatu dute, eta adierazi dute duintasuna “ ez dela negoziatzen”. CEBEKen “blokeo jarrerak” jarraituz gero, mobilizazioei eutsiko dietela ohartarazi dute.
