Hilabetea bukatu aurretik, presaka, Europako Batzordeak atzo jakinarazi zuen abian jarri dituela bi proposamen, besteak beste AEBetako industria salgaiei muga zergak kentzeko, eta sarbidea errazteko Estatu Batuetako nekazaritza eta arrantza salgai batzuei.
Muga zergak bere araudian sartzea baldintza derrigorrezkoa du Europako Batasunak, baldin eta nahi badu Etxe Zuriak Europako automobilei %15eko muga zergak ezartzea eta ez %27,5ekoak.
Abuztuaren 21ean EBk eta AEBek egindako adierazpen bateratuan jaso zen Washingtonen baldintza hori, estatubatuarrek ziurtatu nahi baitute europarren kontzesioak ez direla soilik hitzezkoak izango.
Bruselak uste du proposamenak hilabetea amaitu baino lehen eginda ziurtatuta dagoela abuztuaren 1ean ezartzea autoen gaineko muga zerga apalagoen indarraldiaren hasieratzat, atzerako eraginarekin.
Ikusteko dago proposamen horiek nahikoa diren AEBek autoen gaineko muga zergak apaltzeko. Izan ere, EBren muga zergak kentzeko arauak benetan ezar daitezen, Europako Parlamentuak eta herrialdeek onartu behar dituzte lehenengo.
Presioak
Bruselaren ustez, proposamen horiek beste urrats bat dira EBren eta AEBen arteko merkataritza egonkorra eta aurrez ikusteko modukoa izan dadin. Bruselak horixe darabil argudiotzat — baita AEBen muga zergetan %15eko sabaia izatea ere— Donald Trumpekin uztail amaieran adostutako akordio eskasa justifikatzeko.
Atzo arte, Europako Batzordeak presio handiak izan ditu AEBei muga zergak kentzeko. Presiorik handiena egin dutenen artean dago Alemaniako automobilgintza industria.
Autoak eta txerrikia
Akordioaren baldintzak ezarritakoan, Europaren industria salgairik gehienek —hegazkingintzakoak dira salbuespenetako bat— %15eko muga zergak izango dituzte AEBetan, hala nola automobilek. AEBetako autoek eta auto osagarriek, zurak, larruak eta bestek, aldiz, ez dute muga zergarik izango.
AEBetatik etorritako jaki batzuek ez dute zergarik izango kuota jakin batzuen barruan badaude. Bruselak dio sarbide hori izango dutela, besteak beste, itsaskiek, fruitu lehorrek, esnekiek, fruta eta barazki fresko eta prozesatuek, elikagai prozesatuek, txerrikiak eta bisonte haragiak. Kanpoan geratu dira «nekazaritza produktu sentikorrak», hala nola behi haragia, hegazti haragia, arroza eta etanola.
