Duela bi aste, Dominion adar teknologikoa burtsaratu zuenean, "euskal multinazional txikia" eraiki nahi zuela aldarrikatu zuen Anton Pradera Cie Automotive enpresa bizkaitarreko buruak. Helburu horretan beste urrats bat egin du, Amaya Telleria enpresa taldea erosita, 186 milioi euroren truke.
Grupo Amaya Telleria 1958an Eibarren (Gipuzkoa) sortutako familia enpresa da. Ermuan (Bizkaia) du egoitza, eta fabrikak ditu Zornotzan (Bizkaia), Galizian, Eslovakian, Mexikon eta Brasilen. Autogintzarako osagaiak egiten ditu, eta mekanizatuetan eta presio altuko aluminio injekzioetan espezializatuta dago. 2015ean 134 milioi euro fakturatu zituen, eta 800 langile enplegatzen ditu.
Cie Automotivek bere funts propioekin ordainduko du erosketa: 112 milioi operazioa ixten denean, eta gainontzekoa 2017ko lehen hiruhilekoan. Joan den urtean 129 milioi euroko irabazia lortu zuen Cie Automotivek, aurreko urtean baino %59 gehiago.
Amaya Telleriaren erosketaren bidez, Mexikon, Brasilen eta Europa erdian eta ekialdean beren posizioa sendotzea lortuko dutela aldarrikatu du Jesus Maria Herrera Cie Automotiveko kontseilari ordezkariak. Gainera, aldarrikatu du "Euskadi indartuko duela industriaren erabakigune gisa".
