Brasilgo automobilgintza merkatuan egonkortzeko beste pauso bat eman du CIE Automotive enpresak: Techniplas taldeak herrialde hartan daukan filialaren kapital sozialaren %100 erosi du 65 milioi euroren truke. Aurtengo ekitaldiko EBITDA —zergen eta bankuei ordaindu beharrekoen aurreko emaitza— halako bost da, gutxi gorabehera, eta, eragiketa ixtean, «eskudirutan» ordainduko du, CIE Automotivek Espainiako Balore Merkatuaren Batzorde Nazionalari adierazi dionez.
Brasilgo Techniplasek lantegi bat du Piracicaban, Sao Paulo estatuan; seiehun behargin inguruk lan egiten dute han. Konplexutasun handiko plastikozko osagaiak ekoizten dituzte, dekorazio zatiak eta osagai funtzionalak barne. Iaz 50 milioi euro ingururen salmentak izan zituen.
