LAB, ESK, Steilas, EHNE Etxalde, Hiru eta Nafarroako CGT sindikatuek mobilizazioak egin dituzte gaur Hego Euskal Herriko hiriburuetan, azaroa oraindik amaitzeko dagoela jada iazko lan heriotzen kopurua gainditu dela salatzeko.
Haien kontuen arabera, urte hasieratik hona 65 pertsona hil dira lanean Euskal Herrian, eta iaz urte osoan 64 behargin hil ziren. Hildako kopuruetan gorakada handiena Nafarroan gertatu da, 2024an laneko 17 heriotza izan baitziren eta aurten dagoeneko 21 langile dira hildakoak.
Sindikatuen ustez, arazo honetan «erantzule argiak» daude: prebentzio araudiak betetzen ez dituen patronala, eta araudiak betearazteko bitartekorik jartzen ez dituzten instituzioak.
Horrez gain, nabarmendu dute laneko osasuneko datu ofizialek enpresek komunikatutako istripuak soilik jasotzen dituztela. «Baina badakigu enpresa askok istripu arinak ez dituztela komunikatzen, eta, hori gutxi balitz bezala, mutualitateetako medikuek istripuen larritasuna zehazteko gaitasuna dute, eta datuak leuntzeko joera agerikoa dute», salatu dute.
