Semilla y Belarra elkarte berriak eta 6F plataformak egin dute deia, eta ehunka laborari elkartu dituzte Iruñean. Nafarroan lehen sektorean lanean ari direnentzat errespetua eskatu dute. Antoniutti parketik abiatu dira, Gure etorkizunaren alde. Errespetua idatzia zuen pankarta baten atzean, eta Gaztelu plazan amaitu dute protesta.
Antolatzaileek adierazi dute orain arte «hitz ederrak» aditu dituztela, baina oraindik ez dutela haien aldarrikapenei buruzko neurri zehatzik jaso. «Nafarroako Gobernua bildu da gurekin, baina aurrerabideak oso txikiak izan dira».
Herritarrei mezu hori zabaldu nahi dietela esplikatu dute. Festa giroan egin dute martxa, horregatik, baina ohartarazi dute landa eremuan ez dagoela festa girorik. Fran Jaso laborarik Efe albiste agentziari adierazi dionez, «jendeak ongi pasatzea nahi dugu, eta baketsua izatea. Baina herritarrei esan nahi diegu laboratzaren sektorea batuta dagoela, eta hau denon arazo bat dela».
Ohartarazi dute, aurrerabiderik ez bada, «borrokara» itzuliko direla, eta «beharrezkoak» iruditzen zaizkien neurriak hartuko dituztela.
