Semi Zabala enpresak planta bat zabaldu du Eskuzaitzeta industrialdean, Donostiako Zubieta auzoan. Espazioko misioetan erabiltzen diren txipak edo erdieroaleak muntatuko dituzte han; horiek jaso, paketatu eta probatuko dituzte. Paketatzeko, material berezi bat erabiliko dute: galio nitruroa (GaN). Horrek modua ematen du txipek ingurune gogorretan funtziona dezaten, besteak beste sateliteetan eta beste aplikazio teknologiko batzuetan.
Semi Zabala 2018tik dago Eskuzaitzetan. Enpresako arduradunek azaldu dutenez, planta berriarekin han egin ahal izango dute txipak muntatzeko prozesu osoa. Hamahiru langile arituko dira. Bost urtean 500.000 txip inguru ekoiztea espero dute.
Bezero posibleen artean NASA AEBetako espazio agentzia eta Europako Airbus aipatu ditu. Halaber, bi partzuergotako kide dela azaldu du. Europan erdieroaleen hornidura kate bat sortzeko SAGAN proiektukoa, eta ESGANekoa, espaziorako GaN transistore bat garatzeko helburu duena.
Kapital handitzea
Konpainiak hazten jarraitzeko asmoa dauka. Horretarako, 8,5 milioi euroko finantzaketa jaso du. Horietatik 4,81 milioi euro enpresaren kapitala handitzeko erabiliko du. Dirua jarri dutenen artean daude Elkargi (0,2 milioi) eta Mondragon taldeko Clave Mayor sozietatea (0,5 milioi), eta haiekin batera Donostiako Ap Tech Ventures enpresa (3,11 milioi) eta Seed Gipuzkoa arrisku kapitaleko sozietatea (milioi bat). AEBetako Littelfuse konpainia teknologikoak 0,5 milioiko nota konbertigarri bat erosi du, aurrerago akziodun izateko aukera ematen diona.
Beste 3,2 milioi zorra finantzatzeko erabiliko du, eta hor parte hartu dute Luzaro kreditu erakundeak (1,2 milioi), Elkargik (0,75 milioi), Caixabankek (0,75 milioi), Nafarroako Rural Kutxak (0,25 milioi) eta Finantzen Euskal Institutuak (0,25 milioi).
