Languedoc eta Roselloko zelaietan indarra galdu ondoren, Montjuiceko aldapa txikia nahikoa izan da merkatuak animatu eta lau eguneko beheranzko joera eteteko. Ibex 35 taldeari (%0,88) Sacyr igotzaile trebeak (%11,78) eman dio indarra: eraikuntza enpresa %19 haztera iritsi zen, Panamako kanala handitzeko lortutako kontratuak bultzatuta. Andorrako gaurko etapa gogorraren zain geratu ziren liderrak, BBVA (%1,67), Santander (%1,60) eta Iberdrola (%1,14). Mendiaren usainarekin animatu dira mendi barreneko altxorren bilatzaileak, Angloamerican (%5,60) eta Rio Tinto (%3,77) meatzaritza enpresak. Lehenengoak Xtrataren erosketa eskaintza arbuiatu du, gehiago balio duela argudiatuta, eta bigarrenak Txinako Gobernuaren espioitza akusazioak jaso ditu. Euskalteleko liderrak bezalaxe, erorialdietan denbora galdu dute Repsolek (-%0,59) eta Enagasek (-%0.58), lehen aldiz maiatzaz geroztik petrolioa 60 dolarretik salerosten delako.
Alcoa. AEBetako aluminio enpresak abiatu du lehen seihilekoaren emaitzen lasterketa. Irabazietatik urrun dagoela erakutsi arren -545 milioi dolar galdu ditu-, uste baino sasoi txukunagoan dagoela uste dute analistek.
Ingalaterrako Bankuak ere galga bota du. Interes tasak %0,5ean uzteaz gain, quantitative easing-erako jarritako dirua ere(125.000 milioi libera zor publikoa edo pribatua erosteko) ez ¡kutzea erabaki du. 113.000 milioi dagoeneko erabili ditu.
Interesgarria izango zaizu
Nabarmenduak
