H2Sitek, beste hainbat teknologia zentrorekin elkarlanean, amoniakoa hidrogeno bihurtzeko sistema bat erabili du lehenengoz itsasontzi batean. Bertha B hornidura ontzian egin zuten proba, joan den astean, Bermeoko portutik abiatuta, eta Bizkaiko golkoan ibilbide bat egin zuen ontziak. Mintzezko erreaktoreen teknologia baliatuz, sistemak hidrogenoa sortzen du amoniakotik, erregai pila hornitzeko.
H2Sitek oroitarazi du itsasoko garraioak berotegi efektuko gasen %2 isurtzen dituela, eta gehitu aurrerapauso handia izango litzatekeela sektore hori deskarbonizatzea. Horrez gain, enpresak adierazi du amoniakoa dela munduan gehien garraiatzen den likidoa, eta uste du horrek sistemaren hedapena erraztuko lukeela, lehengaia erraza delako lortzen.
H2Sitek Tecnalia, Zumaia Offshore, Erhardt Offshore, Ajusa, Enagas eta ABS enpresak izan ditu lankide joan den astean egin zuten proban.
