Beste lan heriotza baten berri eman dute. Hil egin da atzo Azpeitiko obra batean lanean ari zela toki garai batetik erori zen behargina. Azpeitia Guka hedabideak jakinarazi duenez, atzoko 11:45 aldean gertatu zen ezbeharra. Iñaki Azpiazu kalean eraikitzen ari diren etxebizitzetan ari zen lanean 44 urteko gizona, eta istripua gertatu eta gero larri eraman zuten Donostia ospitalera. Han hil da.
Lan heriotza honekin, sindikatuek halako 66 zenbatu dituzte aurten Euskal Herrian. Atzo egin zituzten mobilizazioak hainbat sindikatuk, aurten dagoeneko iaz urte osoan baino heriotza gehiago izan direla salatzeko.
