«Ia 140.000 sinadura bildu ditugu. Izugarri eskertzen dugu jendearen babesa; hura gabe ez genuke lortuko». Hala adierazi du Iñaki Martinek, EHPM Euskal Herriko Pentsiodunen Mugimenduko kideak. Hark eta mugimenduko gainerako kideek argi dute bizitza duin baten aldeko borrokak azken bultzada behar duela eta, horretarako, ezinbestekoa dela borroka luze eta tinkoa.
Urte hasieran abiatu zuten sinadura kanpainak harrera zabala izan du. Helburu zehatz bat jarri zuten: inoizko sinadura kopururik handiena lortzea Eusko Legebiltzarrean aurkeztutako HEL herri ekinaldi legegilearen alde. Horregatik, azken sinadurak jasotzeko helburuz, gaur sinadurak biltzeko mahaiak jarri dituzte Araba, Bizkai eta Gipuzkoako hainbat hiri eta herritan, eta mezu argi bat zabaldu dute herritarren arreta pizteko: Zure sinadura falta zaigu. Sinadurak maiatzaren 15ean entregatuko dituztela iragarri du Martinek.
Iazko irailaren 26an aurkeztu zuten HELa Eusko Legebiltzarrean, eta ganberako mahaiak tramiterako onartu zuen. Lege ekinaldia eztabaidatu ahal izateko, gutxienez 10.000 sinadura behar ziren; kopuru hori aspaldi eta nabarmen gainditu dute. Hala ere, iragarri dute sinadurak maiatzean entregatuko dituztela ofizialki, eta azkenera arte lanean jarraituko dutela babes handiagoa bildu nahian. Gaur ikusiko da zenbat sinadura lortu dituzten guztira, baina adierazi dute «oso kopuru handia» lortu nahi dutela.
Ikusi gehiago
EHPMk herritarren parte hartzea eta babesa eskatu ditu azkenera arte, eta pentsio publiko duinak eta gizarte bidezkoagoa eskatu ditu. Eta gaur, berriro ere, jendarteak erantzun egin du: askok sinatu dute, besteak beste, Gasteizko Andre Maria Zuriaren plazako mahaian. Bertan da Martin, adiskideekin sinadurak jasotzen. «Iritsiko al gara 150.000 sinadura lortzera?», galdetu du. Marka aspaldi gainditua den arren, gehiago nahi dituztelako atera dira gaur: «Gaur da sinatzeko azken eguna, jendeak jakin egin behar du».
Gizarteko beste sektoreek ere erantzun dute. EHPMren ustez, zenbat eta sinadura gehiago bildu, orduan eta aukera handiagoa izango da Eusko Legebiltzarrak proposamena kontuan hartzeko. «Egun garrantzitsua da pentsio sistema publikoa defendatzeko eta egiten ari garen lanerako; gutxieneko pentsioa lanbide arteko gutxieneko soldatarekin parekatzeko ari gara lanean. Orain arte Legebiltzarrean aurkeztutako HEL bakar batek ere ez du lortu halako sinadura kopururik, eta hori lortzea da gaurko erronka», adierazi du Martinek, harro.
Helburuak
Proposamenaren helburua da sistema bat sortzea Araban, Bizkaian eta Gipuzkoan erroldatutako 60 urtetik gorako guztiek gutxienez lanbide arteko gutxieneko soldataren pareko pentsioa jaso dezaten. EHPMren kalkuluen arabera, pentsiodunen herenek gutxieneko soldata baino diru sarrera txikiagoak dituzte, eta horien %70 emakumeak dira. Askok hilean 850 euro baino gutxiago jasotzen dute, eta HEL honek 65.000 emakume pentsioduni egingo lieke mesede.
Ekinaldiak jada babesa jaso du hainbat eragileren aldetik: sindikatuak, gizarte erakundeak, emakumeen eta gazteen kolektiboak. Ez da harritzekoa, emakumeak baitira pentsio baxuen jasotzaile nagusiak: «Gutxieneko pentsioek pentsiodunen pobrezia iraunaraziko dute, eta pobrezia horrek bereziki eragiten die aitortu gabeko lan erreproduktiboan eta zaintza lanetan aritu diren emakumeei», salatu dute mugimendutik.
