Gaur goizean moztu du Jakitea elkarteko Xabier Zabaletak Idiazabalgo gazta berria. Oiangu baserrian egin dute ekitaldia, Ordizian (Gipuzkoa). Hantxe egiten duten bigarren urtea da: bigarren urtez jarraian, COVID-19a hemen dela, eta azoka berezirik gabe.
Topalekua, eguna eta egoera bestelakoak izan dira, baina ekitaldi ofizialaren nondik norakoak, berriz, betikoaren kutsua izan du. Erakundeetako ordezkariak izan dira bertan.
Ordiziako Idiazabalgo gaztaren kofradiako kideek ongietorria egin ostean, Ordiziako alkate Adur Ezenarrok hartu du hitza. Ekitaldian parte hartu duten gonbidatuei mintzatu zaie lehenik: Jose Mari Ustarrozi, «Idiazabal gaztaren alde hainbeste urtez egindako lanagatik»; erregulartasun sariak jaso dituztenei; baita gazta mozteko ardura izan duten Jakitea elkarteko kideei ere: «Eskerrik asko, gure sukaldaritzan Idiazabal gaztarekiko apustua egiteagatik beti, eta egoera zail eta ilun hauetan ostalaritzan aurrera egiten jarraitzeagatik».
(Irakurri artikulua osorik, 'Goierriko Hitza'-n)
