Indarrean da telelanaren legea, baina ez die langile guztiei eragingo

Atzo sartu zen indarrean Hego Euskal Herrian telelana arautzen duen Espainiako Gobernuaren araudia. Dena den, hor jasotzen diren neurri guztiek ez diete eragingo COVID-19a dela-eta gaur egun etxetik lanean ari direnei. Horien kasuan, enpresaren ardura izango da langileak behar dituen bitartekoak haren eskura jartzea, orain arte bezala, baina gastuak negoziazio kolektiboaren menpe geratuko dira. Legedi berriaren aterkipean egoteko, berriz, langileak eta enpresak idatzizko akordio bat egin beharko dute. Agiriak, besteak beste, jaso beharko du beharginak gutxienez hiru hilabetez lanaldiaren %30 lantokitik kanpo egingo duela. Enpresaria, gainera, beharginak dituen gastuen erantzule izango da. Era berean, enpresaren lan itunean edo sektorekoan jaso beharko da araudi berria, gehienez hiru urteko epean.