Itxura guztien arabera, prezioen igoera erritmoa ez da biziagotu ekainean Hego Euskal Herrian. Hala ondoriozta daiteke kontuan harturik INE Espainiako estatistika institutuak kontsumo prezio indizearen gainean emandako datu aurreratua. Haren arabera, kontsumo prezioen indizea %3,2an geratu da ekainean, hots, apirileko eta maiatzeko tasa berean. Hego Euskal Herriko tasa ez da hortik urrun ibiliko, maiatzean %3,2an geratu ostean.
Bi faktore kontrajarriren ondorioa da inflazio tasaren egonkortasun hori. Batetik, ekainaren 1ean bukatu ziren Espainiako Gobernuaren neurri batzuk, eta zerga batzuetan ohiko tasak ezarri zituzten berriz, hala nola argindarraren eta gas naturalaren gaineko BEZean eta argindarraren gaineko zerga berezian.
Leheneratze horiek goranzko presioa eragin dute argindarraren eta gasaren salneurrietan, baina, bestetik, neurri handi batean erregaien prezio merkeagoekin konpentsatu dira, Ormuzko itsasartea zabaldu izanak 72 dolarrera jaitsi baitu petrolio upela, gatazka aurreko salneurrietara.
