Jasangarritasunaren alorrean Europatik datozen eskakizunei aurrea hartzea, eta horri esker etorkizuneko merkatu industrialean lehiatzeko abantaila izatea. Helburu hori du Eusko Jaurlaritzak gaur Donostian aurkeztu duen BasquESG proiektuak; Araba, Bizkai eta Gipuzkoako konpainiarik handienekin elkarlanean dabiltzan enpresa txiki eta ertainentzat da egitasmoa, eta espero dute 2026. urtea amaitzerako halako bostehun enpresetara heltzea.
Jaurlaritzaren Euskadi 2030 industria planaren parte da proiektua, eta, agerraldian, konpainia handietako kideak izan ditu alboan Mikel Jauregi Industria sailburuak: han izan dira Kutxabank, Laboral Kutxa, Iberdrola, Petronor, ITP Aero, Ingeteam, CAF, Mercedes Benz eta Sidenor, planean estrategikotzat jotzen diren sektoreetako enpresak guztiak alegia. Jauregik esan du konpainia horien balio katean dauden enpresek «jauzi kualitatibo bat» egin ahalko dutela proiektuari esker: «Europatik egindako exijentziei aurrea hartu ahalko diete, eta funtsezko abantaila izango dute etorkizuneko industria merkatu jasangarrian lehiatzeko».
ESG Environmental, Social and Governance —ingurumena, gizartea eta gobernantza, ingelesez— enpresek alor horietan duten jarduna neurtzeko balio duen sistema bat da. Europako Batzordeak azpimarratu du oso garrantzitsua dela sistema horren parametroetan sartzea, «nazioarteko merkatuetan dabiltzan Europako enpresen gardentasuna, konfiantza eta lehiakortasuna bermatzeko», eta azaldu du, gainera, enpresa txiki eta ertainei bidea erraztuko diela finantzaketa lortzeko, inbertsioak erakartzeko eta bezeroen eskakizunei erantzuteko.
Elkarlana
Jauregiren arabera, BasquESG egitasmoari esker EAE erreferente bilakatuko da ESG estandarren ezarpenean, «elkarlan publiko-pribatu eredugarri baten bitartez». Izan ere, konpainia handiak arduratuko dira proiektura enpresa txiki eta ertainak erakartzeaz, baita Kutxabank eta Laboral Kutxa ere, modua egingo baitute ESG sistemaren parametroak betetzen dituzten enpresek dirua errazago eskuratu dezaten.
Eusko Jaurlaritza da proiektuaren burua, eta Confebaskek, Elkargik, Mondragonek eta Eusko Ganberak osatuko duten aholkulari talde baten laguntza izango du.
