Eusko Jaurlaritzak onartu egin du pentsio osagarrien sistema Arabara eta Bizkaira ere hedatzeko helburua duen araudia. Gobernuaren ustez, baliagarria izango da «estatuan bakarra eta berritzailea den etorkizuneko lehentasunezko enplegu sistema finkatzeko» . Dekretua apirilean sartuko da indarrean, eta sei hilabeteko epea egongo da horretara egokitzeko.
Bi urteko lanketaren ondoren, dekretuak urtarrilaren amaieran jaso zuen Gizarte Aurreikuspenaren Euskal Kontseiluaren onespena. Kontseilu horretan ordezkaritza dute pentsio osagarrien sistema kudeatzen duten talde guztiek, hala nola Eusko Jaurlaritzak, foru aldundiek, kooperatibek, sindikatuek, patronalak eta BGAE borondatezko gizarte aurreikuspenerako erakundeek.
BGAE edo pentsio osagarriak nahiko hedatuta daude Gipuzkoan, Geroaren bitartez. Gipuzkoako metalgintzako lan hitzarmenak sortu zuen BGAE hori, baina gero harekin bat egin dute lurraldeko beste hainbat sektoretako itunek, eta gaur egun langileen erdiek baino gehiagok dute enpleguari lotutako pentsio osagarri bat. Araban eta Bizkaian, ordea, langile publikoek, kooperatibista batzuek eta Kutxabank, Tubacex eta beste enpresa batzuetako langileek dituzte oraindik, gutxi gorabehera langileen %15ek. Nafarroan ere ez daude oso hedatuta.
Eusko Jaurlaritzak onartu duen dekretuan, enpleguari lotutako pentsio osagarriak arautu dituzte. Eta, zehazki, lehentasunezko BGAEak; hau da, enplegatzaileen eta langileen ekarpenarekin hornitzen diren pentsio planak. Horietako hiru daude gaur egun: Geroarena, Elkarkidetzarena (udaletako eta aldundietako langileena), eta Lagun Aro (Mondragoneko eta beste kooperatiba batzuetako langileena).
Plan horien helburua da langileak erretiroa hartzen duenean pentsio osagarri bat eskuratzea hilero. Hots, jarritako dirua errenta gisa kobratzea.
Ikusi gehiago
