Bi-635 errepidean zihoan kamioi bat bidetik irten da gaur arratsaldean, Muxikan (Bizkaia). Ibilgailua errepidearen ondoan doan trenbidera erori da, eta, hartutako kolpe handiaren ondorioz, bertan hil da gidaria.
Eusko Jaurlaritzako Segurtasun Sailak eman du istripuaren berri, eta azaldu du bertaratutako osasun zerbitzuek ezin izan dutela ezer egin kamioilaria salbatzeko. Haren izenaren berri ez dute eman.
Ertzaintzak ikerketa hasi du jakiteko zergatik irten den kamioia bidetik.
Ezbeharraren ondorioz, errepideko eta trenbideko garraioa eten egin behar izan dute, eta auto ilarak izan dira.
LAB sindikatua bere webgunean egiten ari den zenbaketaren arabera, aurten Euskal Herrian lanean hildako 54. langilea da Muxikan zendutakoa, eta gutxienez horietako hamar dira garraiolariak. Sektore horretan gertatu da aurtengo lan ezbeharrik larriena: martxoaren 5ean, N-113 errepideko 101. kilometroan, Fiteroko lurretan (Nafarroa), bi kamioik aurrez aurre jo zuten, eta barruan zihoazen lau garraiolariak hil egin ziren.
