LAB sindikatuak adierazi du langile bat hil zela atzo Bergaran, bere lanpostura oinez zihoala auto batek harrapatuta. Atzo goizean eman zuen Goiena hedabideak ezbeharraren berri. Adierazi zuen ezbeharra 07:00ak aldera gertatu zela, Ibarra kalean, Labegaraietan. Goienaren arabera, anbulantzia joan zen istripuaren tokira, oinezkoa suspertzen saiatzera, baina ez zuten lortu. Bergarako Udaltzaingoak baieztatu zuen hildakoa 38 urteko gizonezko bat zela, Bergarakoa.
Atzokoa 2026ko bosgarren lan heriotza izan zela adierazi du LABek. «Agerian uzten du hutsuneak daudela prebentzioan, ibilbide seguruen plangintzan, ordutegien malgutasunean eta zerbitzu publikoen neurrietan», salatu du oharrean. Gaineratu du laneko arriskuen prebentzioak laneko joan-etorrien segurtasuna jaso behar duela, eta «premiazkoa» dela lantokiko ohiko sarbideetan eta ibilbideetan segurtasun neurriak ezartzea.
