Langile bat hil da gaur Berriobeitiko (Nafarroa) Rocopolis rokodromoan izandako lan istripu batean. Ezbeharra 10:15ak aldera gertatu da, eta goitik erorita zendu da behargina, Nafarroako larrialdi zerbitzuek jakinarazi dutenez. 51 urte zituen.
Gertakariaren berri jasotakoan, anbulantzia bat bertaratu da istripua izan den tokira, baina osasun langileek ezin izan dute ezer egin langilearen bizitza salbatzeko. Foruzaingoko agenteak ere joan dira, eta haiek hartu dute istripuaren inguruko ikerketaren ardura.
Sindikatuen zenbaketaren arabera, aurten Euskal Herrian lanean ari zela hildako zortzigarren pertsona da Berriobeitikoa. Urtarrilaren 8an gertatu zen lehen istripu hilgarria, Urruñan (Lapurdi), eta gaurkoaren aurretik, atzo izan zen azkena. Lantarongo piroteknia enpresa batean izandako leherketa batean langile bat hil zen, eta beste bat larri zauritu zen.
Gaurko lan istripua izan den rokodromoa Berriobeitiko Bideberri industrialdean dago, Iruñetik zazpi kilometrora. Instalazioak 2003an ireki zituzten, eta ordutik hainbat hedapen eta egokitzapen lan egin dizkiote, horma altuagoak eta zailtasun ezberdinetako ibilbideak gehituz.
Foruzaingoak lekukoen adierazpenak biltzen eta instalazioetako baldintzak aztertzen dihardu, ezbeharra zerk eragin duen argitzeko. Oraingoz ez dute xehetasun gehiagorik eman.
